ਲਾਵਾਰਿਸ ਤੋਂ ਵਾਰਿਸ

ਤੂੰ ਡਾਂਵਾਂ ਡੋਲ ਫਿਰਦਾ ਹੈ।

ਜਿਵੇਂ ਹੁੰਦਾ ਹੈ ਲਾ-ਵਾਰਿਸ,

ਸਹਿਨ ਸ਼ਾਹੀ ਦਾ ਵਾਰਸ ਸੈਂ

ਤੂੰ ਹੋ ਰਹਿਆ ਹੈ 'ਨਾ ਵਾਰਿਸ?

ਪਿਤਾ ਵਲ ਪਿੱਠ ਤੇਰੀ ਹੈ,

ਤੂੰ ਛਾਯਾ ਆਪਣੀ ਵੇਖੇਂ,

ਤੂੰ ਛਾਯਾ ਮੱਤਿ ਛਾ ਦਿੱਤੀ,

ਬਣਾ ਦਿੱਤਾ ਹੈ ਲਾਵਾਰਿਸ।

ਏ ਛਾਯਾ ਭੂਤ ਬਣ ਬਣਕੇ

ਹੈ ਭੈ ਦੇਂਦੀ, ਡੁਲਾਂਦੀ ਹੈ,

ਰੁਲਾ ਦਿੱਤੇ ਨੇ ਸ਼ਾਹਜ਼ਾਦੇ

ਇਨ੍ਹੇ ਕਰਕੇ ਹਾਂ ਲਾਵਾਰਿਸ।

ਤੇਰੇ ਵਰਗਯਾਂ ਨੇ ਪਿਠ ਦੇ ਦੇ

ਬਣਾ ਦਿੱਤਾ ਹੈ ਬਾਪੂ ਨੂੰ

ਪੁੱਤਾਂ ਦੇ ਹੁੰਦਿਆਂ: ਕੋਈ,

ਜਿਵੇਂ ਹੁੰਦੈ ਬਿਨਾ ਵਾਰਿਸ।