ਬੇਖੌਫ਼ ਹਵਾ

ਹਾਲੇ ਤਾਂ ਸਾਡੇ ਅੰਦਰ ਬੈਠੇ

ਜੰਗਲ ਨੇ ਬਗਾਵਤ ਕਰਨੀ ਹੈ

ਸਭਿਅਤਾ ਦੇ ਲਿਬਾਸ ਨੂੰ ਲੀਰੋ ਲੀਰ ਕਰਨੈਂ

ਤਮਾਮ ਮਿਲੀਆਂ, ਦਿੱਤੀਆਂ, ਵੰਡੀਆਂ ਗਈਆਂ ਪਛਾਣਾਂ ਤੋਂ

ਰੂਪੋਸ਼ ਹੋ ਕੇ ਮਿਲਣਾ ਹੈ ਅਸੀਂ

ਮਿਲਣਾ ਹੈ ਕਿ ਜਿੱਥੇ

ਆਦੇਸ਼, ਵਰਜਣਾਵਾਂ ਜਿਹਾ ਕੁਝ ਵੀ ਨਹੀਂ ਸੀ

ਜਿੱਥੇ ਤੇਰੇ ਮੇਰੇ ਹਿੱਸੇ ਦੀ

ਆਜ਼ਾਦ, ਬੇਖੌਫ਼ ਹਵਾ ਵੱਗਦੀ ਸੀ

ਜਿੱਥੇ ਸਾਡੀ ਸਰੀਰਾਂ ਦੀ ਖਿੱਚ ਓਨੀ ਹੀ ਸੁੱਚੀ ਸੀ

ਜਿੰਨਾ ਸੁੱਚਾ ਰੱਬ ਦਾ ਨਾਂ

ਜਿੱਥੇ ਸਭ ਕੁਝ ਬਿਨਾਂ ਕਿਸੇ ਕਾਰਨ ਤੋਂ ਆਪਣਾ ਹੀ ਸੀ

ਆਪਾਂ ਉੱਥੇ

ਉਵੇਂ ਹੀ ਮਿਲਦੈਂ ਹੁਣ

ਬਿਨਾਂ ਕਿਸੇ ਕਾਰਨ ਤੋਂ !