ਰੁੱਤ-ਸੁਹਾਵੀ
ਜਦ ਧਰਤੀ ਸੋਹਿਲੇ ਗਾਂਵਦੀ
ਜਦ ਪੌਣਾਂ ਰਚਨ ਵਿਆਹ
ਫਿਰ ਹਰੇ ਕਚੂਰ ਜਿਹੇ ਰੁੱਖੜੇ
ਸਾਨੂੰ ਗੋਦੀ ਲੈਣ ਬਿਠਾ
ਕੋਈ ਤਿੱਤਲੀ ਹੋਠਾਂ ਬੈਠ ਕੇ
ਸਾਡਾ ਅੰਗ ਅੰਗ ਦਏ ਨਸ਼ਿਆ
ਨਾਲੇ ਖੁਸ਼ ਹੋ ਬੱਦਲ ਵਰਸਦੇ
ਸਭ ਪੱਤੇ ਲੈਣ ਨਹਾ
ਜਦ ਧੁੱਪਾਂ ਗਿੱਧੇ ਪਾਉਂਦੀਆਂ
ਸਾਨੂੰ ਓਸ ਰੁੱਤ ਦਾ ਚਾਅ
ਜਿਥੇ ਕਣੀਆਂ ਦੇ ਕਾਂਟੜੇ
ਪਾ ਮੱਛਰੀ ਫਿਰਦੀ ਪੌਣ,
ਜਿਥੇ ਪਿੱਪਲ ਬੋਲੀ ਚੱਕਦੇ
ਜਿਥੇ ਡੇਕਾਂ ਤੀਆਂ ਲਾਉਣ
ਜਿਥੇ ਨਾਮ ਸੱਜਣ ਦਾ ਲੈਂਦਿਆਂ
ਆਏ ਸੁੱਚਾ ਹੋ ਹੋ ਸਾਹ
ਜਦ ਧੁੱਪਾਂ ਗਿੱਧੇ ਪਾਉਂਦੀਆਂ
ਸਾਨੂੰ ਓਸ ਰੁੱਤ ਦਾ ਚਾਅ
