ਮਹਿਕ ਜਾਦੂ

ਅਸੀਂ ਪਏ ਆਂ ਵਿਚ ਦੋ-ਚਿੱਤੀਆਂ ਦੇ

ਹਾਸਾ ਮਹਿਕੇ ਜਾਂ ਤੇਰੀ ਸੰਗ ਮਹਿਕੇ ।

ਕੇਸ ਮਹਿਕਦੇ ਵਾਂਗ ਸੁੱਚੇ ਇੱਤਰਾਂ ਦੇ

ਮਿੱਟੀ ਖੇਤਾਂ ਦੀ ਵਾਂਗੂੰ ਤੇਰਾ ਰੰਗ ਮਹਿਕੇ

 

ਤੇਰੇ ਖ਼ਿਆਲਾਂ 'ਚ ਮਹਿਕਦੇ ਲਫ਼ਜ਼ ਸਾਰੇ

ਜੁੜਦੇ ਗੀਤ ਜਿਵੇਂ ਗੁਲਕੰਦ ਮਹਿਕੇ

ਤੇਰੇ ਕੋਲ ਹੋਈਏ ਮਹਿਕੇ ਚੁੱਪ ਹੋਠੀ

ਹੋਈਏ ਦੂਰ ਤੈਥੋਂ, ਸਾਡੀ ਮੰਗ ਮਹਿਕੇ

 

ਮਹਿਕੇ ਚੇਤੇ ਦੀ ਚੰਦਰੀ ਚਿਣਗ ਏਵੇਂ

ਜਿਵੇਂ ਜੋਗੀ ਦੀ ਅੱਖ ਵਿਚ ਡੰਗ ਮਹਿਕੇ

ਕਦੇ ਦੱਸੀਂ ਖਾਂ ਕਰਕੇ ਤਰਸ ਅੜੀਏ

ਮਹਿਕੇ ਤੂੰ ਜਾਂ ਵੇਖਣ ਦਾ ਢੰਗ ਮਹਿਕੇ।