ਤਰਾਨਾ

ਛੇੜੀਏ ਤਰਾਨਾ ਫੇਰ ਅੱਜ ਉਹਦੇ ਨਾਮ ਦਾ

ਆਜਾ ਮੁੱਲ ਤਾਰੀਏ ਵੇ ਸੋਨੇ ਰੰਗੀ ਸ਼ਾਮ ਦਾ

 

ਅੰਬਰ, ਪਹਾੜਾਂ ਨੂੰ ਅਵਾਜ਼ਾਂ ਪਿਆ ਮਾਰਦਾ

ਮੀਂਹ ਜਿਵੇਂ ਧਰਤੀ ਦੀ ਆਰਤੀ ਉਤਾਰਦਾ

ਬਣੂੰ ਅਫ਼ਸਾਨਾ ਇੰਝ ਤੇਰੇ- ਮੇਰੇ ਨਾਮ ਦਾ

ਆਜਾ ਮੁੱਲ ਤਾਰੀਏ ਵੇ ਸੋਨੇ ਰੰਗੀ ਸ਼ਾਮ ਦਾ

 

ਜੀਹਦੀ ਗੱਲ ਸੁਣਦੀਆਂ 'ਵਾਵਾਂ ਰੁੱਕ-ਰੁੱਕ ਕੇ

ਧੁੱਪਾਂ ਜੀਹਨੂੰ ਤੱਕਦੀਆਂ ਛਾਵਾਂ ਉਹਲੇ ਲੁੱਕ ਕੇ

ਗੀਤਾਂ ਵੱਟੇ ਮਿਲਿਆ ਜੋ ਉਂਝ ਮਹਿੰਗੇ ਦਾਮ ਦਾ

ਆਜਾ ਮੁੱਲ ਤਾਰੀਏ ਵੇ ਸੋਨੇ ਰੰਗੀ ਸ਼ਾਮ ਦਾ

ਬੱਦਲ, ਸਮੁੰਦਰਾਂ 'ਚੋਂ ਨੀਰ ਲੈ ਕੇ ਚੱਲਪੇ

ਖ਼ਿਆਲਾਂ 'ਚ ਤਰਾਸ਼ੀ ਤਸਵੀਰ ਲੈਕੇ ਚੱਲਪੇ

ਪਿੰਡ ਉਹਦੇ ਜਾਣਾ ਭੋਰਾ ਵਿਹਲ ਨਹੀਂ ਅਰਾਮ ਦਾ

ਆਜਾ ਮੁੱਲ ਤਾਰੀਏ ਵੇ ਸੋਨੇ ਰੰਗੀ ਸ਼ਾਮ ਦਾ

 

ਏਦੂੰ ਪਹਿਲਾਂ ਜਾਗ ਪਵੇ ਤਾਰਿਆਂ ਦਾ ਦੇਸ ਵੇ

ਆਜਾ ਆਪਾਂ ਪਹਿਨ ਲਈਏ ਚਾਨਣੀ ਦੇ ਵੇਸ ਵੇ

ਚੁੱਲ੍ਹੇ ਡਾਹ ਫਿਕਰ ਹੋਣ ਵਾਲੇ ਅੰਜਾਮ ਦਾ

ਆਜਾ ਮੁੱਲ ਤਾਰੀਏ ਵੇ ਸੋਨੇ ਰੰਗੀ ਸ਼ਾਮ ਦਾ