ਤੇ ਜਦ ਤਕ ਇਕ ਵੀ ਅਫਗਾਨ ਜਿਉਂਦਾ ਫਿਰਦਾ ਹੈ ਤਦ ਤੀਕ ਖਾਲਸਾ ਪਤਾਅ ਨਹੀਂ ਕਰੇਗਾ। ਅਸੀਂ ਸਮੁੱਚਾ ਪੰਥ ਰਲ ਕੇ ਪਨਾਨਾ ਨੂੰ ਏਥੋਂ ਗੈਰ ਦੇਈਏ ਤੇ ਐਸੇ ਦਵੱਲੀਏ ਕਿ ਮੁੜ ਉਹ ਸਾਡੀ ਧਰਤ ਵੱਲ ਝਾਕ ਨਾ ਸਕਣ।
ਅਸੀਂ ਅਦੀਨਾ ਬੇਗ ਨੂੰ ਲੈ ਕੇ ਜਲੰਧਰ ਵੱਲ ਵਧ ਰਹੇ ਹਾਂ. ਉਸ ਕੋਲ ਦਸ ਹਜ਼ਾਰ ਦੇ ਕਰੀਬ ਫੌਜ ਹੈ। ਆਸ ਹੈ ਕਿ ਖਾਲਸਾ ਵੀ ਸਮਾਚਾਰ ਮਿਲਦੇ ਸਾਹ ਜਲੰਧਰ ਨੂੰ ਕੁਦ ਕਰ ਦੇਵੇਗਾ।
ਵਾਹਿਗੁਰੂ ਜੀ ਕਾ ਖਾਲਸਾ
ਵਾਹਿਗੁਰੂ ਜੀ ਕੀ ਫਤਹਿ॥
ਪੰਥ ਦੇ ਚਰਨਾ ਦੀ ਧੂੜ
ਵਡਭਾਗ ਸਿੰਘ"
ਏਸ ਤੋਂ ਪਹਿਲਾਂ ਕਿ ਬਾਬਾ ਵਡਭਾਗ ਸਿੰਘ ਤੇ ਅਦੀਨਾ ਬੇਗ ਜਲੰਧਰ ਪਹੁੰਚਦੇ, ਬਾਬਾ ਸ਼ਾਮ ਸਿੰਘ ਨਾਰਲੇ ਵਾਲੇ ਤੇ ਬਾਬਾ ਜੱਸਾ ਸਿੰਘ ਆਹਲੂਵਾਲੀਆ ਸਿੱਖ ਜੱਥੇ ਲੈ ਕੇ ਜਲੰਧਰ ਦੀਆਂ ਹੱਦਾਂ ਕੋਲ ਆ ਖਲੋਤੇ। ਰਸਤੇ ਵਿਚ ਜਿੱਥੇ ਕਿਤੇ ਪਠਾਨ ਮਿਲੇ ਜਾਂ ਉਹਨਾਂ ਦੇ ਕਬਜ਼ੇ ਵਾਲਾ ਇਲਾਕਾ ਆਇਆ ਸਿੰਘਾਂ ਨੇ ਲੁੱਟ ਲਿਆ।
ਏਧਰ ਅਫਗਾਨਾਂ ਨੂੰ ਖਬਰ ਲੱਗਣ 'ਤੇ ਉਹਨਾਂ ਨੇ ਵੀ ਚੜ੍ਹਾਈ ਕਰ ਦਿੱਤੀ। ਮੁਰਾਦ ਖਾਂ ਤੇ ਬੁਲੰਦ ਖਾਂ ਵੱਡੀ ਫੌਜ ਲੈ ਕੇ ਜਲੰਧਰ ਆ ਲੱਥੇ। ਅਦੀਨਾ ਬੇਗ ਨੂੰ ਪਤਾ ਲੱਗਾ ਤਾਂ ਉਸ ਦੇ ਚਿਹਰੇ 'ਤੇ ਖੁਸ਼ਕੀ ਆ ਗਈ। ਹਲਕਾਰੇ ਨੇ ਦੱਸਿਆ ਕਿ ਬੁਲੰਦ ਖਾਂ ਦੀ ਫੌਜ ਸਿੱਧੀ ਅਦੀਨਾ ਬੇਗ ਵੱਲ ਹੀ ਆ ਰਹੀ ਸੀ। ਅਦੀਨੇ ਨੇ ਆਪਣੇ ਲਸ਼ਕਰ ਨੂੰ ਰੁਕਣ ਦਾ ਇਸ਼ਾਰਾ ਕਰ ਦਿੱਤਾ। ਏਥੋਂ ਹੁਣ ਇੰਚ ਅੱਗੇ ਵਧਣਾ ਵੀ ਅਦੀਨੇ ਨੂੰ ਔਖਾ ਜਾਪ ਰਿਹਾ ਸੀ।
" ਖਾਲਸਾ ਆ ਗਿਆ ਹੈ ਹਜ਼ੂਰ ਆ ਗਿਆ ਹੈ ਖਾਲਸਾ "
ਦੂਰੋਂ ਭੱਜਿਆ ਆਉਂਦਾ ਇਕ ਸੂਹੀਆ ਬੋਲ ਰਿਹਾ ਸੀ,
"ਖਾਲਸੇ ਨੇ ਮਾਹਲਪੁਰ ਨੇੜੇ ਉਤਾਰਾ ਕਰ ਲਿਆ ਹੈ ਤੇ ਬੁਲੰਦ ਖਾਂ ਦੀ ਵੀ ਦੂਜੇ ਪਾਸਿਓ ਸਾਹਮਣੇ ਖੜੀ ਹੈ " ਸੂਹੀਆ ਅੰਗ ਬੋਲਿਆ।
ਖਾਲਸੇ ਦੇ ਆਉਣ ਦੀ ਖਬਰ ਸੁਣ ਕੇ ਅਦੀਨੇ ਦੇ ਸਾਹ ਵਿਚ ਸਾਹ ਆਏ। ਉਸ ਨੇ ਫੌਜ ਨੂੰ ਚੱਲਣ ਦਾ ਇਸ਼ਾਰਾ ਕੀਤਾ ਤੇ ਜਲਦ ਹੀ ਉਹ ਖਾਲਸੇ ਦੇ ਦਲਾਂ ਨਾਲ ਮਿਲ ਗਏ। ਮਾਹਲਪੁਰ ਨੇੜੇ ਦੇਵੇਂ ਫੌਜਾਂ ਆਹਮੇ ਸਾਹਮਣੇ ਹੋ ਗਈਆਂ।
