ਸਮਾਪਤੀ ਕਥਨ

ਅਸੀਂ ਆਪਣੇ 7 ਅਧਿਆਇ, ਜਾਂ 7 ਪਾਠ ਪੂਰੇ ਕਰ ਲਏ ਹਨ। ਪਰ ਫਿਰ ਵੀ ਇਹ ਤੁਹਾਡੇ ਲਈ ਇਕ ਸ਼ੁਰੂਆਤ ਹੀ ਹੈ। ਇਹ ਸ਼ੁਰੂਆਤ ਹੈ ਉਨ੍ਹਾਂ ਚੀਜ਼ਾਂ ਨੂੰ ਦੇਖਣਾ ਸ਼ੁਰੂ ਕਰਨ ਦੀ ਜਿਹੜੀਆਂ ਹਮੇਸ਼ਾਂ ਮੌਜੂਦ ਸਨ ਪਰ ਤੁਸੀਂ ਕਦੇ ਇਨ੍ਹਾਂ ਨੂੰ ਪ੍ਰਤੀਤ ਨਹੀਂ ਸੀ ਕੀਤਾ। ਹੁਣ ਤੁਸੀਂ ਆਪਣੀਆਂ ਹਰਕਤਾਂ ਵੱਲ ਧਿਆਨ ਦੇ ਕੇ ਆਪਣੇ ਲਈ ਪਹਿਲਾਂ ਤੋਂ ਬਿਹਤਰ ਸਰੀਰਕ ਭਾਸ਼ਾ ਦੀ ਸਿਰਜਣਾ ਕਰ ਸਕਦੇ ਹੋ। ਸਮੁੱਚਾ ਪ੍ਰਭਾਵ ਛੋਟੀਆਂ ਛੋਟੀਆਂ ਚੀਜ਼ਾਂ ਉੱਤੇ ਹੀ ਨਿਰਭਰ ਕਰਦਾ ਹੈ। ਜਦੋਂ ਤੁਸੀਂ ਆਪਣੇ ਅੰਦਰ ਇਹ ਛੋਟੀਆਂ ਛੋਟੀਆਂ ਤਬਦੀਲੀਆਂ ਕਰ ਲਉਗੇ ਤਾਂ ਤੁਸੀਂ ਆਪਣੇ ਦੂਜਿਆਂ ਨਾਲ ਮੇਲਜੋਲ ਅਤੇ ਵਿਚਾਰ ਵਟਾਂਦਰੇ ਨੂੰ ਹੋਰ ਪ੍ਰਭਾਵਸ਼ਾਲੀ ਬਣਾ ਲਉਗੇ।

ਹੁਣ ਤੁਸੀਂ ਆਪਣੇ ਆਲੇ ਦੁਆਲੇ ਦੇ ਲੋਕਾਂ ਵਲੋਂ ਕੀਤੀਆਂ ਜਾਂ ਰਹੀਆਂ (ਸੁਚੇਤ ਅਤੇ ਅਚੇਤ) ਹਰਕਤਾਂ ਵੱਲ ਧਿਆਨ ਦੇ ਸਕੋਗੇ, ਜਿਨ੍ਹਾਂ ਬਾਰੇ ਅਸੀਂ ਹੁਣੇ ਹੁਣੇ ਪੜ੍ਹਿਆ ਹੈ। ਪਰ ਇਕ ਵੱਡਾ ਫਰਕ ਪੈ ਜਾਵੇਗਾ-ਹੁਣ ਤੁਸੀਂ ਜਾਣਦੇ ਹੋ ਕਿ ਇਨ੍ਹਾਂ ਹਰਕਤਾਂ ਦਾ ਅਰਥ ਕੀ ਹੈ! ਉਹ ਅਸਲ ਵਿਚ ਕੀ ਕਹਿ ਰਹੇ ਹਨ।

ਜੌਹਨ ਕੀਟਸ ਨੇ ਆਈਜ਼ਕ ਨਿਊਟਨ ਤੇ ਇਹ ਇਲਜ਼ਾਮ ਲਗਾਇਆ ਸੀ ਕਿ ਉਸ ਨੇ ਸਤਰੰਗੀ ਪੀਂਘ ਦੇ ਭੇਤ ਖੋਲ੍ਹ ਕੇ ਇਸ ਦੀ 'ਕਵਿਤਾ' ਅਤੇ ਮਧੁਰਤਾ ਖਤਮ ਕਰ ਦਿੱਤੀ ਹੈ। ਕਈ ਲੋਕ ਇਹ ਸੋਚਦੇ ਹਨ ਕਿ ਮਨੁੱਖੀ ਵਿਉਹਾਰ ਦੇ ਭੇਤ ਨਹੀਂ ਖੋਲ੍ਹਣੇ ਚਾਹੀਦੇ। ਅਸੀਂ ਕੀ ਕਿਉਂ ਕਰਦੇ ਹਾਂ, ਇਹ ਇਕ ਭੇਤ ਹੀ ਬਣਿਆ ਰਹਿਣਾ ਚਾਹੀਦਾ ਹੈ। ਪਰ ਸਰੀਰ ਦੀ ਭਾਸ਼ਾ ਇੰਨਾ ਮਹੱਤਵਪੂਰਨ ਵਿਸ਼ਾ ਹੈ ਕਿ ਅਜਿਹਾ ਨਹੀਂ ਕੀਤਾ ਜਾ ਸਕਦਾ। ਮੈਨੂੰ ਇਹੀ ਆਸ ਹੈ ਕਿ ਇਸ ਨਵੇਂ ਪ੍ਰਾਪਤ ਕੀਤੇ ਗਿਆਨ ਦੀ ਮਦਦ ਨਾਲ ਤੁਸੀਂ ਆਪਣੇ ਸਬੰਧ ਅਤੇ ਰਿਸ਼ਤੇ ਹੋਰ ਸੁਧਾਰ ਸਕੋਗੇ । ਹੁਣ ਤੁਸੀਂ ਜਾਣਦੇ ਹੋ ਕਿ ਤੁਸੀਂ ਸਚਮੁੱਚ ਹੀ ਕਿਸੇ ਦੇ ਮਨ ਅੰਦਰ ਦੀਆਂ ਗੱਲਾਂ ਪੜ੍ਹ (ਸਮਝ) ਸਕਦੇ ਹੋ। ਮੈਂ ਇਕ ਵਾਰੀ ਫਿਰ ਯਾਦ ਕਰਾ ਦਿਆਂ:

• ਮਨ ਇਕ ਵਿਚਾਰ ਪੈਦਾ ਕਰਦਾ ਹੈ।
• ਇਹ ਵਿਚਾਰ ਇਕ ਭਾਵਨਾ ਪੈਦਾ ਕਰ ਦਿੰਦਾ ਹੈ।
• ਇਹ ਭਾਵਨਾ ਸਰੀਰਕ ਭਾਸ਼ਾ ਦੇ ਰਸਤੇ ਬਾਹਰ ਆ ਜਾਂਦੀ ਹੈ