7. ਚਾਂਦਨੀ

ਉੱਚੇ ਪਰਬਤਾਂ ਤੇ ਦਿਆਰਾਂ ਯਾ ਕੇਲੋਂ ਦੇ ਬ੍ਰਿੱਛ ਹੁੰਦੇ ਹਨ, ਜਿਨ੍ਹਾਂ ਦੇ ਪੱਤੇ ਸੂਈ ਵਾਂਗੂ ਖੜੇ ਹੁੰਦੇ ਹਨ । ਖਿੜੀ ਚਾਂਦਨੀ ਦੀਆਂ ਰਿਸ਼ਮਾਂ ਦੇ ਇਨ੍ਹਾਂ ਪੱਤਿਆਂ ਤੇ ਪੈਣ ਸਮੇਂ ਦੇ ਦਿਲ ਤਰੰਗ:-

 

ਸੂਈਆਂ ਨਾਲੋਂ ਨਿੱਕੇ ਨਿੱਕੇ

ਚਾਂਦਨੀ ਦੇ ਪੈਰ ਸਹੀਓ,

ਕੇਲੋਂ ਦੀਆਂ ਸੂਈਆਂ ਉੱਤੇ

ਆਨ ਆਨ ਟਿੱਕਦੇ,

 

ਏਥੋਂ ਛਾਲਾਂ ਮਾਰ ਟੱਪ

ਪੈਣ ਚਿੱਟੇ ਪੱਥਰਾਂ ਤੇ,

ਓਥੋਂ ਕੱਦ ਹੇਠ ਖੱਡ

ਪਾਣੀ ਉੱਤੇ ਡਿੱਗਦੇ,

 

ਲਹਿਰਾਂ ਦੇ ਉੱਤੇ ਉੱਤੇ

ਤਿਲ ਮਿਲ ਖੇਡਦੇ ਨੀ,

ਪੋਲੇ ਪੋਲੇ ਰੱਖ ਰੱਖ

ਠੁਮਕ ਠੁਮਕ ਠਿੱਕਦੇ ।

 

ਨਾਚ ਕਰਨ ਪੂਣੀ ਉੱਤੇ,

ਲਾਸ਼ਾਂ ਮਰਨ ਪੌਣ ਵਿਚ,

ਚਾਂਦਨੀ ਦੇ ਨੈਣ ਉੱਪਰ

ਚੰਦ ਵੱਲ ਤੱਕਦੇ ।

 

ਚੰਦ ਭਰਿਆ ਪਯਾਰ ਨਾਲ

ਤੱਕੇ ਵਲ ਚਾਂਦਨੀ ਦੇ,

ਤੱਕਦਾ ਏ ਸਾਰਾ ਸਹੀਓ !

ਅੱਖ ਹੀ ਜੇ ਹੋ ਰਿਹਾ ।

 

ਚਾਨਣ ਚੰਦ ਦੇਂਵਦਾ ਜੇ

ਚਾਨਣਾ ਏ ਆਪ ਸਾਰਾ,

ਚਾਨਣੀ ਦੇ ਚਾਨਣੇ ਨੂੰ

ਵੇਖ ਰੀਝ ਜੇ ਰਿਹਾ ।