ਜਵਾਬ ਪੌਣ ਦਾ ਸਭਨਾਂ ਵਲੋਂ :

ਅਵੇ ਢੱਠੇ! ਤੂੰ ਐਵੇਂ ਵਧ ਗਿਓਂ ਵੇ! ਬੜੇ ਲੰਮੇ! ਸਊਰੋਂ ਨਿਘਰਿਓਂ ਵੇ!

ਲਈ ਤੂੰ ਭੋਗ ਉਮਰਾ ਸੀ ਲੰਮੇਰੀ ਨ ਜੀਵਨ ਰਮਜ਼ ਤੂੰ ਪਾਈ ਰਤੇਰੀ।

 

ਤਿਰੀ ਇਸ ਡੀਲ ਵਿਚ ਵਸਦੀ ਕਣੀ ਸੀ ਕਣੀ ਜੀਵਨ' ਕਿ ਜਿਸ ਤੋਂਦੇਹ ਬਣੀ ਸੀ।

ਉਸੀ 'ਜੀਵਨ-ਕਣੀ' ਇਕ ਭੇਤ ਭਾਈ, ਦੁਆਲੇ ਆ ਜਿਦ੍ਹੇ ਜਗ ਘੁੰਮਿਆ ਈ।

 

ਪਵਣ ਪਾਣੀ ਧਰਤਿ ਗਰਮੀ ਤੇ ਚਾਨਣ ਸਭੇ ਉਸ ਇਕ ਕਣੀ ਨੂੰ ਆਣ ਮਾਨਣ।

ਚੁਗਿਰਦੇ ਓਸਦੇ ਸਭ ਆਣ ਭੌਂਦੇ, ਲਿਆ ਭੇਟਾ ਉਦੇ ਚਰਨਾ ਤੇ ਪੌਦੇ।

 

ਜਿਥੇ ਹੋ ਵਾਸ ਆ ਓਸੇ ਕਣੀ ਦਾ ਸਦਾ ਜਾ ਦਾਸ ਓਸੇ ਦਾ ਬਣੀ ਦਾ।

ਕਣੀ ਜਦ ਤੀਕ ਹੈਵੇ ਵਿੱਚ ਵਸਦੀ ਜਦੋਂ ਤਾਈਂ ਹੈ ਜਿੰਦੜੀ ਲਾਸ ਲਸਦੀ।

 

ਤਦੋਂ ਤਾਈਂ ਸਭੇ ਕੋਈ ਆਇ ਪਾਲੇ ਇ ਕੁਦਰਤਿ ਕੰਮ ਹਨ ਕੁਦਰਤ ਦੇ ਚਾਲੇ।

ਜਦੋਂ ਜਿੰਦ ਦੀ ਕਣੀ ਨੇ ਰਾਹ ਲੀਤਾ ਜਦੋਂ ਜਿੰਦੜੀ ਨੇ ਖਾਲੀ ਖੇਲ ਕੀਤਾ,

 

ਤਦੋਂ ਫਿਰ । ਕੌਣ ਆ ਕੇ ਪਾਲਦਾ ਹੈ ਜੁ ਸੀ ਪਾਲੇ ਸੁਈ ਫਿਰ ਘਾਲਦਾ ਹੈ।

ਉ ਪਾਲਣਹਾਰ ਘਾਲਣਹਾਰ ਬਣਦਾ ਖਿਲਾਵਣਹਾਰ ਡੇਗਣਾਰ ਬਣਦਾ।

 

ਜੁ ਤੂੰ ਦੇਖੇਂ ਜ਼ਿਮੀਂ ਅਸਮਾਨ ਫਿਰਦਾ ਧਰਤ ਸੂਰਜ ਨਛੱਤ੍ਰ ਘੇਰ ਘਿਰਦਾ,

ਪਵਣ ਪਾਣੀ ਤੇ ਬਿਜਲੀ ਮਾਰ ਕਰਦੀ ਬਰਫ਼ ਬੱਦਲ ਗਰਮ ਰੁਤ ਨਾਲ ਸਰਦੀ,

ਸਭੇ ਜੀਵਨ ਕਣੀ ਨੂੰ ਪਾਲਦੇ ਨੇ ਗਏ ਜੀਵਨ ਤੇ ਸਭ ਹੀ ਘਾਲਦੇ ਨੇ।

(ਕਸੌਲੀ 12-9-26)