ਖਿਮਾ ਸੰਜੋਅ

ਧਾਰੀ ਹੈ ਖਿਮਾ ਮਾਨੇ ਧਾਰੀ ਹੈ ਸੰਜੋਅ,

ਢਾਲ ਰਖ੍ਯਾ-ਕਾਰਨੀ ਪ੍ਯਾਰੀ ਹੈ 'ਸੰਜੋਅ'।

 

ਖਿਮਾ ਖੜਗ ਵੈਰੀਆਂ ਦੇ ਵਾਰ ਪਰਹਰੇ,

ਢਾਲ, ਤਲਵਾਰ, ਰਖ੍ਯਾਕਾਰੀ ਏ ਸੰਜੋਅ।

 

ਗ੍ਯਾਨ ਵਾਲੇ ਚਾਨਣੇ ਦੀ ਚਿਮਨੀ ਹੈ ਖਿਮਾ

ਐਸਾ ਯਾਨ ਦੇਂਵਦਾ ਏ ਮਿੱਠੀ ਮਿੱਠੀ ਲੋਅ।

 

ਠੰਢ ਦੇ ਦਿਲਾਂ ਨੂੰ ਏ ਪਾਂਦੀ ਹੈ ਖਿਮਾ

ਅੱਥ ਚਾਰ ਅੱਖੀਆਂ ਦੇ ਰੋਕੇ ਵਿਚ ਖਲੋਅ।

 

ਵਾਰ ਕਰਨਾ ਸੌਖਾ ਪਰ ਔਖੀ ਹੈ ਖਿਮਾ

ਸੂਰਮਾ ਜੋ ਧਾਰੇ ਏਸ ਵਿਰਲਾ ਕੋਈ ਕੋਅ।

 

ਔਖੀ ਖਿਮਾ ਧਾਰਨੀ ਪੈ ਕੀਮਤੀ ਹੈ ਢੇਰ,

ਗਹਿਣਾਂ ਹੈ ਵਡਿੱਤ ਦਾ ਫ਼ਕੀਰੀ ਦੀ ਸੰਜੋਅ।

(ਕਸੌਲੀ 6-9-50)