ਖੌਰੇ...
ਚੰਨ ਦੇ ਨਾਲ ਇਕ ਚੰਨ ਵਹਿੰਨਾ ਵਾਂ
ਚੰਨ ਨੂੰ ਲਾਉਂਦਾ ਸੰਨ ਵਹਿੰਨਾ ਵਾਂ
ਚੰਨ ਜਦੋਂ ਚੰਨ ਵਿੱਚ ਜਾ ਵੜਦਾ ਏ
ਫੇਰ ਮੈਂ ਚੰਨ ਨਾਲ ਗੱਲਾਂ ਕਰਨਾ
ਪੂਰੇ ਚੰਨ ਦੀ ਰਾਤ ਹੋਵੇ ਤੇ
ਖੌਰੇ...
ਬੈਠਾ-ਬੈਠਾ ਬਕ ਕੇ ਆਪੇ
ਈ ਹੱਸ ਪੈਨਾਂ ਵਾਂ
ਜੇਸਰਾਂ ਕੋਈ ਦੱਬੇ ਪੈਰੀਂ
ਮਗਰੋਂ ਆ ਕੇ
ਕੰਨ ਕੋਲ ਮੂੰਹ ਨਾਲ ਠਾਹ ਕਰ ਦੇਵੇ
ਪੂਰੇ ਚੰਨ ਦੀ ਰਾਤ ਹੋਵੇ ਤੇ
ਖੌਰੇ...
ਚੰਨ ਦੀ ਅੱਖ ਵਿੱਚ ਅੱਖ ਪਾਵਾਂ
ਤੇ ਅੱਖੋਂ ਪਾਣੀ ਇੰਝ ਟੁਰਦਾ ਏ
ਜੇਸਰਾਂ ਕੋਈ ਕਵਾਰਾ ਪੁੱਤਰ
ਪਿਉ ਨਾਲ ਲੜ ਕੇ ਘਰ ਛੱਡ ਦੇਵੇ
ਪੂਰੇ ਚੰਨ ਦੀ ਰਾਤ ਹੋਵੇ ਤੇ
