ਅੱਲ੍ਹਾ ਦੇ ਘਰ ਘੱਲੋ ਦਾਣੇ
ਫ਼ਰਸ਼ ਪੁਰਾਣਾ ਪੁੱਟ ਮਸਜਿਦ ਦਾ,
ਛੇਤੀ ਕਰੀਏ ਨਵਾਂ ਲਵਾਈਏ।
ਕੰਧਾਂ ਨਾਲ ਵੀ ਸੰਗੇਮਰਮਰ,
ਯਾਂ ਚੀਨੀ ਦੀਆਂ ਟਾਇਲਾਂ ਲਾਈਏ।
ਬੰਦੇ ਪਏ ਕੁੱਲੇ ਨੂੰ ਤਰਸਣ,
ਰੱਬ ਪਿਆ ਮਹਿਲੀਂ ਮੌਜਾਂ ਮਾਣੇ।
ਅੱਲ੍ਹਾ ਦੇ ਘਰ ਘੱਲੋ ਦਾਣੇ,
ਭਾਵੇਂ ਅੱਲ੍ਹਾ ਨੇ ਨਈਂ ਖਾਣੇ।
ਅੱਲ੍ਹਾ ਦੇ ਘਰ ਘੱਲੋ ਦਾਣੇ ਚੌਧਰੀ,
ਹੱਕ ਮੁਜਾਰੇ ਦਾ ਵੀ,
ਮਸਜਿਦ ਦੇ ਵਿਚ ਦੇ ਜਾਏ ਭਾਵੇਂ।
ਮੀਆਂ ਜੀ ਉਹਨੂੰ ਬਹਾ ਦਿੰਦੇ ਨੇ,
ਜੰਨਤ ਦੇ ਵਿਚ ਠੰਡੀ ਛਾਵੇਂ।
ਕਣਕ ਤੋ ਸਾਵੀਂ ਜੰਨਤ ਵੇਚੇ,
ਵੇਖੋ ਮੁੱਲਾ ਹਾਸੇ ਭਾਣੇ।
ਅੱਲ੍ਹਾ ਦੇ ਘਰ ਘੱਲੋ ਦਾਣੇ,
ਭਾਵੇਂ ਅੱਲ੍ਹਾ ਨੇ ਨਈਂ ਖਾਣੇ।
ਅੱਲ੍ਹਾ ਦੇ ਘਰ ਘੱਲੋ ਦਾਣੇ
