19. ਬੰਦੇ ਆਪ ਨੂੰ ਪਛਾਣ

ਬੰਦੇ ਆਪ ਨੂੰ ਪਛਾਣ ।

ਜੇ ਤੈਂ ਆਪਦਾ ਆਪੁ ਪਛਾਤਾ,

ਸਾਈਂ ਦਾ ਮਿਲਣ ਅਸਾਨੁ ।ਰਹਾਉ।

 

ਸੋਇਨੇ ਦੇ ਕੋਟੁ ਰੁਪਹਿਰੀ ਛੱਜੇ,

ਹਰਿ ਬਿਨੁ ਜਾਣਿ ਮਸਾਣੁ ।1।

 

ਤੇਰੇ ਸਿਰ ਤੇ ਜਮੁ ਸਾਜਸ਼ ਕਰਦਾ,

ਭਾਵੇਂ ਤੂੰ ਜਾਣ ਨ ਜਾਣ ।2।

 

ਸਾਢੇ ਤਿਨ ਹਥਿ ਮਿਲਖ ਤੁਸਾਡੀ,

ਏਡੇ ਤੂੰ ਤਾਣੇ ਨਾ ਤਾਣੁ ।3।

 

ਸੁਇਨਾ ਰੁਪਾ ਤੇ ਮਾਲੁ ਖ਼ਜ਼ੀਨਾ,

ਹੋਇ ਰਹਿਆ ਮਹਿਮਾਨੁ ।4।

 

ਕਹੈ ਹੁਸੈਨ ਫ਼ਕੀਰ ਨਿਮਾਣਾ,

ਛੱਡਿ ਦੇ ਖ਼ੁਦੀ ਗੁਮਾਨੁ ।5।

 

20. ਬੁਰੀਆਂ ਬੁਰੀਆਂ ਬੁਰੀਆਂ ਵੇ

ਬੁਰੀਆਂ ਬੁਰੀਆਂ ਬੁਰੀਆਂ ਵੇ,

ਅਸੀਂ ਬੁਰੀਆਂ ਵੇ ਲੋਕਾ ।

 

ਬੁਰੀਆਂ ਕੋਲ ਨ ਬਹੁ ਵੇ ।

ਤੀਰਾਂ ਤੇ ਤਲਵਾਰਾਂ ਕੋਲੋਂ,

ਤਿੱਖੀਆਂ ਬਿਰਹੁੰ ਦੀਆਂ ਛੁਰੀਆਂ ਵੇ ਲੋਕਾ ।1।ਰਹਾਉ।