21. ਚਾਰੇ ਪਲੂ ਚੋਲਣੀ, ਨੈਣ ਰੋਂਦੀ ਦੇ ਭਿੰਨੇ

ਚਾਰੇ ਪਲੂ ਚੋਲਣੀ,

ਨੈਣ ਰੋਂਦੀ ਦੇ ਭਿੰਨੇ ।ਰਹਾਉ।

 

ਕਤਿ ਨ ਜਾਣਾ ਪੂਣੀਆਂ,

ਦੋਸ਼ ਦੇਨੀਆਂ ਮੁੰਨੇ ।1।

 

ਆਵਣੁ ਆਵਣੁ ਕਹਿ ਗਏ,

ਮਾਹਿ ਬਾਰਾਂ ਪੁੰਨੇ ।2।

 

ਇਕ ਅੰਨ੍ਹੇਰੀ ਕੋਠੜੀ,

ਦੂਜੇ ਮਿੱਤਰ ਵਿਛੁੰਨੇ ।3।

 

ਕਾਲੇ ਹਰਨਾ ਚਰ ਗਿਉਂ

ਸ਼ਾਹ ਹੁਸੈਨ ਦੇ ਬੰਨੇ ।4।

 

22. ਚੰਦੀਂ ਹਜਾਰ ਆਲਮੁ ਤੂੰ ਕੇਹੜੀਆਂ ਕੁੜੇ

ਚੰਦੀਂ ਹਜਾਰ ਆਲਮੁ ਤੂੰ ਕੇਹੜੀਆਂ ਕੁੜੇ ।

ਚਰੇਂਦੀ ਆਈ ਲੇਲੜੇ,

ਤੁਮੇਂਦੀ ਉੱਨ ਕੁੜੇ ।ਰਹਾਉ।

 

ਉੱਚੀ ਘਾਟੀ ਚੜ੍ਹਦਿਆਂ,

ਤੇਰੇ ਕੰਡੇ ਪੈਰ ਪੁੜੇ ।

ਤੈਂ ਜੇਹਾ ਮੈਂ ਕੋਈ ਨ ਡਿੱਠਾ,

ਅੱਗੇ ਹੋਇ ਮੁੜੇ ।1।

 

ਬਿਨਾਂ ਅਮਲਾਂ ਆਦਮੀ,

ਵੈਂਦੇ ਕੱਖੁ ਲੁੜੇ ।

ਪੀਰ ਪੈਕੰਬਰ ਅਉਲੀਏ,

ਦਰਗਹ ਜਾਇ ਵੜੇ ।2।

 

ਸਭੇ ਪਾਣੀ ਹਾਰੀਆਂ,

ਰੰਗਾ ਰੰਗ ਘੜੇ ।

ਸ਼ਾਹ ਹੁਸੈਨ ਫ਼ਕੀਰ ਸਾਈਂ ਦਾ,

ਦਰਗਹ ਵੰਜ ਖੜੇ ।3।