41. ਘੁੰਮ ਚਰਖੜਿਆ ਘੁੰਮ (ਵੇ)

ਘੁੰਮ ਚਰਖੜਿਆ ਘੁੰਮ (ਵੇ),

ਤੇਰੀ ਕੱਤਣ ਵਾਲੀ ਜੀਵੇ,

ਨਲੀਆਂ ਵੱਟਣਿ ਵਾਲੀ ਜੀਵੇ ।ਰਹਾਉ।

 

ਬੁੱਢਾ ਹੋਇਓਂ ਸ਼ਾਹ ਹੁਸੈਨਾ,

ਦੰਦੀਂ ਝੇਰਾਂ ਪਈਆਂ,

ਉਠਿ ਸਵੇਰੇ ਢੂੰਡਣਿ ਲਗੋਂ,

ਸੰਝਿ ਦੀਆਂ ਜੋ ਗਈਆਂ ।1।

 

ਹਰ ਦਮ ਨਾਮ ਸਮਾਲ ਸਾਈਂ ਦਾ,

ਤਾਂ ਤੂੰ ਇਸਥਿਰ ਥੀਵੇਂ,

ਪੰਜਾਂ ਨਦੀਆਂ ਦੇ ਮੂੰਹ ਆਇਆ,

ਕਿਤ ਗੁਣ ਚਾਇਆ ਜੀਵੇਂ ।2।

 

ਚਰਖਾ ਬੋਲੇ ਸਾਈਂ ਸਾਈਂ,

ਬਾਇੜ ਬੋਲੇ ਤੂੰ,

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,

ਮੈਂ ਨਾਹੀਂ ਸਭ ਤੂੰ ।3।

 

42. ਗੋਇਲੜਾ ਦਿਨ ਚਾਰਿ

ਗੋਇਲੜਾ ਦਿਨ ਚਾਰਿ,

ਕੁੜੇ ਸਈਆਂ ਖੇਡਣਿ ਆਈਆਂ ਨੀ ।ਰਹਾਉ।

 

ਭੋਲੀ ਮਾਉ ਨ ਖੇਡਣਿ ਦੇਈ,

ਹੰਝੂ ਦਰਦ ਰੁਆਈਆਂ ਨੀ ।

ਚੰਦ ਕੇ ਚਾਂਦਨ ਸਈਆਂ ਖੇਡਣਿ,

ਗਾਫ਼ਲ ਤਿਮਰ ਰਹਾਈਆਂ ਨੀ ।1।

 

ਸਾਹੁਰੜੇ ਘਰ ਅਲਬਿਤ ਜਾਣਾ,

ਜਾਣਨ ਸੇ ਸਭਰਾਈਆਂ ਨੀ ।

ਕਹੈ ਹੁਸੈਨ ਫ਼ਕੀਰ ਨਿਮਾਣਾ,

ਜਿਨਾਂ ਚਾਈਆਂ ਸੋ ਤੋੜ ਨਿਭਾਈਆਂ ਨੀ ।2।