ਵੇਹੜੇ ਦੇ ਵਿਚਿ ਆਲਾ ਸੋਹੇ,

ਆਲੇ ਦੇ ਵਿਚ ਤਾਕੀ,

ਤਾਕੀ ਦੇ ਵਿਚਿ ਸੇਜ ਵਿਛਾਵਾਂ,

ਅਪਣੇ ਪੀਆ ਸੰਗਿ ਰਾਤੀ ।3।

 

ਇਸ ਵੇਹੜੇ ਵਿਚ ਮਕਨਾਂ ਹਾਥੀ,

ਸੰਗਲ ਨਾਲ ਖਹੇੜੇ,

ਕਹੈ ਹੁਸੈਨ ਫ਼ਕੀਰ ਸਾਂਈਂ ਦਾ,

ਜਾਗਦਿਆਂ ਕਉਣ ਛੇੜੇ ।4।

 

62. ਜਿੰਦੂ ਮੈਂਡੜੀਏ

ਜਿੰਦੂ ਮੈਂਡੜੀਏ,

ਤੇਰਾ ਨਲੀਆਂ ਦਾ ਵਖਤ ਵਿਹਾਣਾ ।ਰਹਾਉ ।

 

ਰਾਤੀਂ ਕਤੈਂ ਰਾਤੀਂ ਅਟੇਰੈਂ,

ਗੋਸ਼ੇ ਲਾਇਓ ਤਾਣਾ ।

 

ਇਕ ਜੁ ਤੰਦ ਅਵੱਲਾ ਪੈ ਗਇਆ,

ਸਾਹਿਬ ਮੂਲ ਨ ਭਾਣਾ ।

 

ਚਾਰ ਦਿਹਾੜੇ ਗੋਇਲ ਵਾਸਾ,

ਉਠ ਚੜਦਾ ਪਛੋਤਾਣਾ ।

 

ਚੀਰੀ ਆਈ ਢਿੱਲ ਨ ਕਰਸੀ,

ਕੀ ਰਾਜਾ ਕੀ ਰਾਣਾ ।

 

ਕਿਸੇ ਨਵਾਂ ਕਿਸੇ ਪੁਰਾਣਾ,

ਕਿਸੇ ਅੱਧੋਰਾਣਾ ।

 

ਕਹੈ ਹੁਸੈਨ ਫ਼ਕੀਰ ਸਾਂਈਂ ਦਾ,

ਬਿਨ ਮਸਲਤ ਉੱਠ ਜਾਣਾ ।