69. ਕਦੀ ਸਮਝ ਨਿਦਾਨਾ

ਕਦੀ ਸਮਝ ਨਿਦਾਨਾ,

ਘਰਿ ਕਿੱਥੇ ਈ ਸਮਝ ਨਿਦਾਨਾ ।ਰਹਾਉ।

 

ਆਪਿ ਕਮੀਨਾ ਤੇਰੀ ਅਕਲ ਕਮੀਨੀ,

ਕਉਣ ਕਹੈ ਤੂੰ ਦਾਨਾ ।1।

 

ਇਨ੍ਹੀਂ ਰਾਹੀਂ ਜਾਂਦੇ ਡਿੱਠੜੇ,

ਮੀਰ, ਮਲਕ, ਸੁਲਤਾਨਾ ।2।

 

ਆਪੇ ਮਾਰੇ ਤੇ ਆਪ ਜੀਵਾਲੇ,

ਅਜ਼ਰਾਈਲ ਬਹਾਨਾ ।2।

 

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,

ਬਿਨ ਮਸਲਤਿ ਉਠ ਜਾਣਾ ।4।

 

70. ਕੈ ਬਾਗੈ ਦੀ ਮੂਲੀ ਹੁਸੈਨ

ਕੈ ਬਾਗੈ ਦੀ ਮੂਲੀ ਹੁਸੈਨ,

ਤੂੰ ਕੈ ਬਾਗੈ ਦੀ ਮੂਲੀ ।ਰਹਾਉ।

 

ਬਾਗਾਂ ਦੇ ਵਿਚਿ ਫੁਲਿ ਅਜਾਇਬ,

ਤੂੰ ਬੀ ਇਕ ਗੰਧੂਲੀ ।1।

 

ਆਪਣਾ ਆਪਿ ਪਛਾਣੇ ਨਾਹੀਂ,

ਅਵਰਾ ਦੇਖਿ ਕਿਉਂ ਭੂਲੀ ।2।

 

ਇਸ਼ਕੇ ਦੇ ਦਰਿਆਉ ਕਰਾਹੀ,

ਮਨਸੂਰ ਕਬੂਲੀ ਸੂਲੀ ।3।

 

ਸ਼ਾਹ ਹੁਸੈਨ ਪਇਆ ਦਰ ਉਤੇ,

ਜੇ ਕਰਿ ਪਵੈ ਕਬੂਲੀ ।4।