10. ਅਨੀ ਜਿੰਦੇ ਮੈਂਡੜੀਏ

ਅਨੀ ਜਿੰਦੇ ਮੈਂਡੜੀਏ,

ਤੇਰਾ ਨਲੀਆਂ ਦਾ ਵਖਤੁ ਵਿਹਾਣਾ ।1।ਰਹਾਉ।

 

ਰਾਤੀਂ ਕੱਤੇਂ ਦਿਹੀਂ ਅਟੇਰੇਂ,

ਗੋਡੇ ਲਾਇਓ ਤਾਣਾ ।1।

 

ਕੋਈ ਜੋ ਤੰਦ ਪਈ ਅਵਲੀ,

ਸਾਹਿਬ ਮੂਲ ਨ ਭਾਣਾ ।2।

 

ਚੀਰੀ ਆਈ ਢਿਲ ਨ ਕਾਈ,

ਕਿਆ ਰਾਜਾ ਕਿਆ ਰਾਣਾ ।3।

 

ਕਹੈ ਹੁਸੈਨ ਫ਼ਕੀਰ ਸਾਂਈਂ ਦਾ,

ਡਾਢੇ ਦਾ ਰਾਹੁ ਨਿਮਾਣਾ ।4।

 

11. ਅਨੀ ਸਈਓ ਨੀਂ

ਅਨੀ ਸਈਓ ਨੀਂ,

ਮੈਂ ਕੱਤਦੀ ਕੱਤਦੀ ਹੁੱਟੀ,

ਅੱਤਣ ਦੇ ਵਿਚ ਗੋੜੇ ਰੁਲਦੇ,

ਹਥਿ ਵਿਚ ਰਹਿ ਗਈ ਜੁਟੀ ।1।ਰਹਾਉ।

 

ਸਾਰੇ ਵਰ੍ਹੇ ਵਿਚ ਛੱਲੀ ਇਕ ਕੱਤੀ,

ਕਾਗ ਮਰੇਂਦਾ ਝੁੱਟੀ ।1।

 

ਸੇਜੇ ਆਵਾਂ ਕੰਤ ਨ ਭਾਵਾਂ,

ਕਾਈ ਵੱਗ ਗਈ ਕਲਮੁ ਅਪੁਠੀ ।2।

 

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,

ਸਭ ਦੁਨੀਆਂ ਜਾਂਦੀ ਡਿੱਠੀ ।4।