149. ਤੁਝੈ ਗੋਰਿ ਬੁਲਾਵੈ ਘਰਿ ਆਉ ਰੇ

ਤੁਝੈ ਗੋਰਿ ਬੁਲਾਵੈ ਘਰਿ ਆਉ ਰੇ ।

ਜੋ ਆਵੈ ਸੋ ਰਹਣ ਨ ਪਾਵੈ,

ਕਿਆ ਮੀਰ ਮਲਕੁ ਉਮਰਾਉ ਰੇ ।ਰਹਾਉ।

 

ਹਰ ਦਮ ਨਾਮੁ ਸਮਾਲਿ ਸਾਈਂ ਦਾ,

ਇਹ ਅਉਸਰ ਇਹ ਦਾਉ ਰੇ ।1।

 

ਕਹੈ ਹੁਸੈਨ ਫ਼ਕੀਰ ਨਿਮਾਣਾ,

ਆਖ਼ਰ ਖ਼ਾਕ ਸਮਾਉ ਰੇ ।2।

 

150. ਟੁਕ ਬੂਝ ਮਨ ਮੇਂ ਕਉਣ ਹੈ

ਟੁਕ ਬੂਝ ਮਨ ਮੇਂ ਕਉਣ ਹੈ,

ਸਭ ਦੇਖੁ ਆਵਾਗਉਣ ਹੈ ।

 

ਮਨ ਅਉਰ ਹੈ ਤਨ ਅਉਰ ਹੈ,

ਮਨ ਕਾ ਵਸੀਲਾ ਪਉਣ ਹੈ ।ਰਹਾਉ।

 

ਬੰਦਾ ਬਣਾਇਆ ਜਾਪ ਕੋ,

ਤੂੰ ਕੇਹਾ ਲੁਭਾਣਾ ਪਾਪ ਕੋ,

ਤੈਂ ਸਹੀ ਕੀ ਕੀਆ ਆਪ ਕੋ ।1।

 

ਇਕ ਸ਼ਾਹ ਹੁਸੈਨ ਫ਼ਕੀਰ ਹੈ,

ਤੁਸੀਂ ਨ ਆਖੋ ਪੀਰ ਹੈ,

ਜਗ ਚਲਤਾ ਦੇਖਿ ਵਹੀਰ ਹੈ ।2।