153. ਤੁਸੀਂ ਮਤਿ ਕੋਈ ਕਰੋ ਗੁਮਾਨ

ਤੁਸੀਂ ਮਤਿ ਕੋਈ ਕਰੋ ਗੁਮਾਨ,

ਜੋਬਨ ਧਨ ਠੱਗੁ ਹੈ ।1।ਰਹਾਉ।

 

ਹੰਸਾਂ ਦੇ ਭੁਲਾਵੇ ਭੁਲੀ,

ਝੋਲੀ ਲੀਤਾ ਬੱਗ ਹੈ ।1।

 

ਪੱਬਣ ਪੱਤ੍ਰ ਉਪਰਿ ਮੌਤ,

ਤਿਵਹੀਂ ਸਾਰਾ ਜੱਗ ਹੈ ।2।

 

ਨਿੰਦਿਆ ਧ੍ਰੋਹ ਬਖੀਲੀ ਚੁਗਲੀ,

ਨਿੱਤ ਕਰਦਾ ਫਿਰਦਾ ਠੱਗ ਹੈ ।3।

 

ਕਹੈ ਹੁਸੈਨ ਸੇਈ ਜੱਗ ਆਏ,

ਜਿਨ੍ਹਾਂ ਪਛਾਤਾ ਰੱਬ ਹੈ ।4।

 

154. ਤੁਸੀਂ ਰਲ ਮਿਲਿ ਦੇਹੁ ਮੁਮਾਰਖਾਂ

ਤੁਸੀਂ ਰਲ ਮਿਲਿ ਦੇਹੁ ਮੁਮਾਰਖਾਂ,

ਮੇਰਾ ਸੋਹਣਾ ਸਜਣ ਘਰਿ ਆਇਆ ਹੀ ।1।ਰਹਾਉ।

 

ਜਿਸ ਸਜਣ ਨੂੰ ਮੈਂ ਢੂੰਢੇਦੀ ਵਤਾਂ,

ਸੋ ਸਜਣ ਮੈਂ ਪਾਇਆ ਹੀ ।1।

 

ਵੇਹੜਾ ਤਾਂ ਅੰਙਣੁ ਮੇਰਾ,

ਭਇਆ ਸੁਹਾਵਣਾ,

ਮਾਥੇ ਨੂਰ ਸੁਹਾਇਆ ਹੀ ।2।

 

ਕਹੈ ਹੁਸੈਨ ਫ਼ਕੀਰ ਨਿਮਾਣਾ,

ਮੁਰਸ਼ਦ ਦੋਸਤ ਮਿਲਾਇਆ ਹੀ ।3।