ਤੇ ਮੈਨੂੰ ਦੱਸੋ

ਇਹ ਇੱਲਾਂ ਕਿੱਧਰ ਜਾ ਰਹੀਆਂ ਹਨ ?

ਕੌਣ ਮਰਿਆ ਹੈ ?

ਸਮਾਂ ਕੋਈ ਕੁੱਤਾ ਨਹੀਂ

ਕਿ ਸੰਗਲੀ ਫੜ ਕੇ ਜਿੱਧਰ ਮਰਜ਼ੀ ਧੂਹ ਲਵੋ

ਤੁਸੀਂ ਕਹਿੰਦੇ ਹੋ

ਮਾਓ ਇਹ ਕਹਿੰਦਾ, ਮਾਓ ਉਹ ਕਹਿੰਦਾ ਹੇ

ਮੈਂ ਪੁੱਛਦਾ ਹਾਂ, ਮਾਓ ਕਹਿਣ ਵਾਲਾ ਕੌਣ ਹੈ ?

ਸ਼ਬਦ ਗਿਰਵੀ ਨਹੀਂ

ਸਮਾਂ ਗੱਲ ਆਪ ਕਰਦਾ ਹੈ

ਪਲ, ਗੁੰਗੇ ਨਹੀਂ।

 

ਤੁਸੀਂ ਰੈਂਬਲ 'ਚ ਬੈਠੋ

ਜਾਂ ਪਿਆਲਾ ਚਾਹ ਦਾ ਰੇੜ੍ਹੀ ਤੋਂ ਪੀਓ

ਸੱਚ ਬੋਲੋ ਜਾਂ ਝੂਠ-

ਕੋਈ ਫਰਕ ਨਹੀਂ ਪੈਂਦਾ,

ਭਾਵੇਂ ਚੁੱਪ ਦੀ ਲਾਸ਼ ਵੀ ਛਲ੍ਹ ਕੇ ਲੰਘ ਜਾਵੋ

 

……………

ਤੇ ਐ ਹਕੂਮਤ

ਆਪਣੀ ਪੋਲੀਸ ਨੂੰ ਪੁੱਛ ਕੇ ਇਹ ਦੱਸ

ਕਿ ਸੀਖਾਂ ਅੰਦਰ ਮੈਂ ਕੈਦ ਹਾਂ

ਜਾਂ ਸੀਖਾਂ ਤੋਂ ਬਾਹਰ ਇਹ ਸਿਪਾਹੀ ?

ਸੱਚ ਏ. ਆਈ. ਆਰ. ਦੀ ਰਖੇਲ ਨਹੀਂ

ਸਮਾਂ ਕੋਈ ਕੁੱਤਾ ਨਹੀਂ

 

17. ਅਰਥਾਂ ਦਾ ਅਪਮਾਨ

 

ਤੁਸਾਂ ਨੇ ਜਾਣ ਬੁੱਝ ਕੇ ਅਰਥਾਂ ਦਾ ਅਪਮਾਨ ਕੀਤਾ ਹੈ

ਆਵਾਰਾ ਸ਼ਬਦਾਂ ਦਾ ਇਲਜ਼ਾਮ

ਹੁਣ ਕਿਸ ਨੂੰ ਦੇਵੋਗੇ ?

ਮੈਨੂੰ ਇਹ ਰੁੱਖ ਪੁੱਛਦੇ ਹਨ

ਕਿ ਉਸ ਸੂਰਜ ਨੂੰ ਕੀ ਕਹੀਏ

ਜਿਹੜਾ ਕਿ ਗਰਮ ਨਾ ਹੋਵੇ

ਜ੍ਹਿਦਾ ਰੰਗ ਲਾਲ ਨਾ ਹੋਵੇ।

 

ਮੈਂ ਰੁੱਖਾਂ ਵੱਲ ਤੱਕਦਾ ਹਾਂ

ਹਵਾ ਦੇ ਰੰਗ ਗਿਣਦਾ ਹਾਂ

ਤੇ ਰੁੱਤ ਦਾ ਨਾਪ ਕਰਦਾ ਹਾਂ

ਤੇ ਮੈਥੋਂ ਫੇਰ ਸੂਰਜ ਨੂੰ ਬੇਦੋਸ਼ਾ ਆਖ ਨਹੀਂ ਹੁੰਦਾ।

ਮੈਂ ਸੁਰਜ ਵਾਸਤੇ

ਗ਼ੁਸਤਾਖ ਸ਼ਬਦਾਂ ਨੂੰ ਸੁਅੰਬਰ 'ਚ ਬਿਠਾਉਂਦਾ ਹਾਂ,

ਤੁਸੀਂ ਸਮਝੋਗੇ

ਮੈਂ ਚੋਟੀ 'ਤੇ ਖੜ੍ਹ ਕੇ ਖੱਡ ਦੇ ਵਿਚ ਛਾਲ ਮਾਰੀ ਹੈ

ਅਸਲ ਗੱਲ ਹੋਰ ਹੈ

ਮੈਂ ਤਾਂ ਖੱਡਾਂ ਦੇ ਅਰਥ ਬਦਲੇ ਹਨ