ਗੰਧਲਾ ਮਾਹੌਲ

ਮੁਹੱਬਤ ਕਦੀ ਵੀ ਅਸ਼ਲੀਲ ਨਹੀਂ ਹੁੰਦੀ

ਮਾਂ ਬੱਚੇ ਦਾ ਮੱਥਾ ਚੁੰਮਦੀ ਏ

ਬੱਚਾ ਅੱਗੋਂ ਹੱਸਦਾ ਏ

ਅਸ਼ਲੀਲਤਾ ਤੁਹਾਡੀਆਂ ਨਜ਼ਰਾਂ 'ਚ ਹੁੰਦੀ ਏ

ਤੁਸੀਂ ਏਹੋ ਵੀਡਿਉ ਬਣਾ ਪੋਰਨ

ਸਾਈਟਸ 'ਤੇ ਚੜਾ ਦਿੰਦੇ ਹੋ

ਸ਼ਹਿਰ ਜਾਂਦੀ ਇਕੱਲੀ ਕੁੜੀ ਦਾ

ਸਰੀਰ ਮਿਣਦੇ ਓ

ਮੌਕਾ ਮਿਲਣ ਨਾਲ ਖਹਿ ਕੇ ਠਰਕ ਭੋਰਦੇ ਹੋ

ਜਦ ਮੂੰਹ 'ਤੇ ਕਰਾਰੀ ਚਪੇੜ ਵੱਜਦੀ ਏ

ਤਾਂ ਕੁੜੀ ਨੂੰ ਰੰਡੀ ਦੱਸਦੇ ਹੋ, ਥਾਂ ਥਾਂ ਭੰਡਦੇ ਹੋ

ਤੇ ਆਖਦੇ ਹੋ ਭੇਡਾਂ ਵਾਂਗ

ਤੁਰੀਆਂ ਫਿਰਦੀਆਂ ਕੁੜੀਆਂ ਤਾਂ ।

ਭੈਣ ਆਵਦੀ ਨੂੰ ਸਿਨਮੇ ਘਰ ਤੀਕ ਨਹੀਂ ਜਾਂਦੇ

ਤੁਸੀਂ ਡਰਦੇ ਹੋ

ਕਿ ਤੁਹਾਡੀ ਮਰਦ ਜਾਤ ਦਾ

ਸੱਚ ਨਾ ਬਾਹਰ ਆ ਜੇ

ਕੋਈ ਤੁਹਾਡੀ ਭੈਣ ਨਾਲ ਖਹਿ ਜੇ

ਕੋਈ ਹਰਾਮੀ ਤੁਹਾਡੀ ਭੈਣ ਨੂੰ

ਨਾ ਕੰਜਰੀ ਕਹਿ ਜੇ

ਤੁਹਾਨੂੰ ਨਹੀਂ ਪਤਾ

ਹਰਦਮ ਚਾਰਦੁਆਰੀ 'ਚ ਰਹਿਣ ਵਾਲਾ ਜੀਅ

ਸਾਹ ਘੁੱਟਣ ਨਾਲ ਮਰ ਜਾਂਦਾ ?

ਪਰ ਕੀ ਕੀਤਾ ਜਾਵੇ

ਤੁਸੀਂ ਮਰਦ ਜਾਤ ਨੇ ਤਾਂ ਬਾਹਰਲਾ ਮਾਹੌਲ ਵੀ

ਗੰਧਲਾ ਕਰ ਰੱਖਿਆ

ਕੁੜੀਆਂ ਕਿੱਥੇ ਜਾਣ?