ਧਾਰਮਿਕ ਸਥਾਨ

ਧਾਰਮਿਕ ਸਥਾਨਾਂ 'ਤੇ ਖੜਿਆ

ਬਹੁਤਿਆਂ ਮਰਦਾਂ ਦੇ ਮਨ ਥਿਰਕਦੇ

ਮੱਥਾ ਟੇਕਣ ਲਈ ਝੁਕੀ ਔਰਤ ਦਾ

ਪਿੱਛਾ ਦੇਖਣ ਲਈ ਮਨ ਮਚਲਦਾ

ਤੇ ਔਰਤ ਦੀ ਕਲੀਵੇਜ਼ ਤੱਕ ਆਪੇ ਨਾਲ

ਗੁਦਗਦੀਆਂ ਕਰਦਾ ਮਰਦ ਭੁੱਲ ਜਾਂਦਾ

ਗੁਰੂਘਰਾਂ ਤੇ ਕੰਜ਼ਰਖਾਨਿਆਂ ਵਿਚਲਾ ਫ਼ਰਕ

 

ਕਿੰਨੀ ਸਨਸਨੀ ਮਚਾ ਦਿੱਤੀ

ਓਸ ਔਰਤ ਦੀ ਵੀਡਿਓ ਨੇ

ਜੋ ਜੱਥੇਦਾਰ ਉੱਪਰ ਰੇਪ ਦੇ ਦੋਸ਼ ਲਾ ਰਹੀ ਏ

ਪਰ ਕਿਉਂ ਨਜ਼ਰਅੰਦਾਜ਼ ਕਰ ਜਾਂਦੇ ਹਾਂ।

ਹਜ਼ਾਰਾਂ ਓਹਨਾਂ ਔਰਤਾਂ ਨੂੰ

ਜਿਨ੍ਹਾਂ ਦੇ ਰੋਜ਼ ਨਜ਼ਰਾਂ ਨਾਲ ਬਲਾਤਕਾਰ ਹੁੰਦੇ

ਤੇ ਓਹਨਾਂ ਦੀ ਕੋਈ ਰਪਟ ਵੀ ਦਰਜ ਨਹੀਂ ਕਰਦਾ

ਧਾਰਮਿਕ ਸਥਾਨਾਂ ਨੂੰ ਗੰਦਾ ਕਰਨ ਵਾਲੇ ਅਸੀਂ

ਗੁਰਦੁਆਰਿਆਂ ਦੇ ਰਾਖੇ ਬਣ ਠਰਕ ਭੋਰਦੇ ਹਾਂ

ਤੇ ਫਿਰ ਖੁਦ ਨੂੰ 'ਬਾਬੇ ਨਾਨਕ'

ਨਾਲ ਜੋੜਦੇ ਹਾਂ...