ਜੀ ਮੈਂ ਬਾਰੀ ਗੁੱਗਾ ਜੀ

ਛੰਨਾ ਭਰਿਆ ਮਾਹਾਂ ਦਾ

ਗੁੱਗਾ ਮਹਿਰਮ ਸਭਨਾਂ ਥਾਵਾਂ ਦਾ

ਜੀ ਮੈਂ ਬਾਰੀ ਗੁੱਗਾ ਜੀ

ਛੱਨਾ ਭਰਿਆ ਤੇਲ ਦਾ

ਮੇਰਾ ਗੁੱਗਾ ਮਾੜੀ ਵਿੱਚ ਮੇਹਲਦਾ

ਜੀ ਮੈਂ ਬਾਰੀ ਗੁੱਗਾ ਜੀ

ਜੀ ਹੋ

ਜਿਨ੍ਹਾਂ ਦੀ ਕੁਖ ਹਰੀ ਨਾ ਹੋਵੇ, ਉਹ ਗੁੱਗੇ ਪਾਸੋਂ ਵਰ ਮੰਗਦੀਆਂ ਹਨ –

ਧੌਲੀਏ ਦਾਹੜੀਏ

ਚਿੱਟੀਏ ਪੱਗੇ ਨੀ

ਅਰਜ਼ ਕਰੇਨੀਆਂ ਗੁੱਗੇ ਦੇ ਅੱਗੇ ਨੀ

ਸੁੱਕੀਆਂ ਬੋਲਾਂ ਨੂੰ

ਜੇ ਫਲ ਲੱਗੇ ਨੀ

ਗੁੱਗੇ ਦੀ ਪੂਜਾ ਸਾਰਾ ਜਗ ਕਰਦਾ ਹੈ, ਇਕ ਤਿਉਹਾਰ ਵਾਂਗ ਇਹ ਦਿਨ ਮਨਾਉਂਦਾ ਹੈ :-

ਗੁੱਗੇ ਰਾਜੇ ਨੂੰ ਪਰਸਣ ਮੈਂ ਚੱਲੀ

ਜੀ ਕੂਟਾਂ ਚੱਲੀਆਂ ਚਾਰੇ

ਜੀ ਜਗ ਚੱਲਿਆ ਸਾਰਾ

ਸੰਤਾਂ ਦੀਆਂ ਸੰਤਣੀਆਂ ਚੱਲੀਆਂ

ਜੀ ਬਾਹੀਂ ਚੂੜੇ ਛਣਕਣ

ਗੁੱਗੇ ਰਾਜੇ ਨੂੰ ਪਰਸਣ ਮੈਂ ਚੱਲੀ

ਜੀ ਜਗ ਚਲਿਆ ਸਾਰਾ

ਝੁਕ ਰਹੀਆਂ ਟਾਹਲੀਆਂ

ਜੀ ਕੂਟਾਂ ਝੁਕੀਆਂ ਚਾਰੇ

ਇਹ ਧਰਤੀ ਹੀ ਗੁੱਗੇ ਦੀ ਹੈ, ਚਾਰੇ ਪਾਸੇ ਏਸੇ ਦਾ ਰਾਜ ਹੈ। ਗੀਤ ਦੇ ਬੋਲ ਹਨ :-

ਗੁੱਗੇ ਰਾਜੇ ਦੇ ਦਰਬਾਰ

ਜਿੱਥੇ ਧਰੇ ਨਗਾਰੇ ਚਾਰ

ਚੋਹੀਂ ਕੂਟੀਂ ਤੇਰਾ ਰਾਜ

ਪਰਜਾ ਵਸੇ ਸੁਖਾਲੀ ਹੋ

ਗੁੱਗੇ ਰਾਜੇ ਦੇ ਦਰਬਾਰ

ਜਿੱਥੇ ਧਰੇ ਨਗਾਰੇ ਚਾਰ