138

ਸੋਹਣਾ ਵਿਆਂਦੜ ਰੱਥ ਵਿੱਚ ਬਹਿ ਗਿਆ

ਹੇਠ ਚੁਤੈਹੀ ਵਿਛਾ ਕੇ

ਊਠਾਂ ਤੇ ਸਭ ਜਾਨੀ ਚੜ੍ਹ ਗਏ

ਝਾਂਜਰਾਂ ਛੋਟੀਆਂ ਪਾ ਕੇ

ਰੱਥ ਗੱਡੀਆਂ ਦਾ ਅੰਤ ਨਾ ਕੋਈ

ਜਾਨੀ ਚੜ੍ਹ ਗਏ ਸਜ ਸਜਾ ਕੇ

ਜੰਨ ਆਈ ਜਦ ਕੁੜੀਆਂ ਦੇਖਣ

ਆਈਆਂ ਹੁੰਮ ਹੁਮਾ ਕੇ

ਵਿਆਂਦੜ ਫੁੱਲ ਵਰਗਾ-

ਦੇਖ ਵਿਆਹੁਲੀਏ ਆ ਕੇ

139

ਊਠਾਂ ਵਾਲਿਆਂ ਰਾਹ ਰੋਕ ਲਏ

ਕੁੜੀਆਂ ਨੇ ਜੂਹਾਂ ਮੱਲੀਆਂ

ਮੇਲੇ ਜੈਤੋਂ ਦੇ-

ਸੋਹਣੀਆਂ ਤੇ ਸੱਸੀਆਂ ਚੱਲੀਆਂ

140

ਹਰ ਵੇ ਬਾਬਲਾ ਹਰ ਵੇ

ਮੇਰਾ ਮਾਝੇ ਸਾਕ ਨਾ ਕਰ ਵੇ

ਮਾਝੇ ਦੇ ਜੱਟ ਬੁਰੇ ਸੁਣੀਂਦੇ

ਪਾਉਂਦੇ ਊਠ ਨੂੰ ਖਲ ਵੇ

ਖਲ ਤਾਂ ਸਾਥੋਂ ਕੁੱਟੀ ਨਾ ਜਾਵੇ

ਗੁੱਤੋਂ ਲੈਂਦੇ ਫੜ ਵੇ

ਮੇਰਾ ਉਡੇ ਡੋਰੀਆ-

ਮਹਿਲਾਂ ਵਾਲੇ ਘਰ ਵੇ

141

ਲੰਡੇ ਊਠ ਨੂੰ ਸ਼ਰਾਬ ਪਿਆਵੇ

ਭੈਣ ਬਖਤੌਰੇ ਦੀ

142

ਐਤਕੀਂ ਫਸਲ ਦੇ ਦਾਣੇ

ਲਾ ਦਈਂ ਵੀਰਾ ਬੱਗੇ ਊਠ ਤੇ