154

ਵੇ ਮੈਂ ਅਮਰਵੇਲ ਪੁਟ ਲਿਆਵਾਂ

ਬੋਤਾ ਤੇਰਾ ਭੁੱਖਾ ਵੀਰਨਾ

155

ਜਿਹੜਾ ਡੰਡੀਆਂ ਹਿੱਲਣ ਨਾ ਦੇਵੇ

ਬੋਤਾ ਲਿਆਵੀ ਉਹ ਮਿੱਤਰਾ

156

ਸੁਣ ਨੀ ਕੁੜੀਏ ਮਛਲੀ ਵਾਲੀਏ

ਤੇਰੀ ਭੈਣ ਦਾ ਸਾਕ ਲਿਆਵਾਂ

ਤੈਨੂੰ ਬਣਾਵਾਂ ਸਾਲੀ

ਫੇਰ ਆਪਾਂ ਚੜ੍ਹ ਚੱਲੀਏ

ਮੇਰੀ ਬੋਤੀ ਝਾਂਜਰਾਂ ਵਾਲੀ

ਬੋਤੀ ਮੇਰੀ ਐਂ ਚਲਦੀ

ਜਿਵੇਂ ਚਲਦੀ ਡਾਕ ਸਵਾਰੀ

ਬੋਤੀ ਨੇ ਛਾਲ ਚੱਕ ਲੀ

ਜੁੱਤੀ ਡਿਗਗੀ ਸਤਾਰਿਆਂ ਵਾਲੀ

ਡਿਗਦੀ ਨੂੰ ਡਿਗ ਲੈਣ ਦੇ

ਪਿੰਡ ਚੱਲ ਕੇ ਸਮਾਦੂੰ ਚਾਲੀ

ਲਹਿੰਗੇ ਤੇਰੇ ਨੂੰ- ਧੁਣਖ ਲਵਾਦੂੰ ਕਾਲੀ

157

ਉੱਚੇ ਟਿੱਬੇ ਮੇਰੀ ਬੋਤੀ ਚੁਗਦੀ

ਨੀਵੇਂ ਕਰਦੀ ਲੇਡੇ

ਤੋਰ ਸ਼ੁਕੀਨਾਂ ਦੀ-

ਤੂੰ ਕੀ ਜਾਣੇਂ ਭੇਡੇ

158

ਨਿੱਕੀ-ਨਿੱਕੀ ਕਣੀ ਦਾ ਮੀਂਹ ਵਰਸੇਂਦਾ

ਛੜਿਆ ਦਾ ਢਹਿ ਗਿਆ ਕੋਠਾ

ਛੜਿਓ ਪੁੰਨ ਕਰ ਦੋ

ਬੋਡਾ ਭਰਿਆ ਜਹਾਜ਼ ਖਲੋਤਾ

ਪਤਲੋ ਐਂ ਲੰਘ ਗੀ

ਜਿਵੇਂ ਲੰਘ ਗਿਆ ਸੜਕ ਤੇ ਬੇਤਾ

ਅੱਖੀਆਂ ਮਾਰ ਗਿਆ-

ਜ਼ੈਲਦਾਰ ਦਾ ਪੋਤਾ