ਨੱਥ ਮੱਛਲੀ, ਮੇਖ ਤੇ ਕੋਕਾ

ਇਹ ਨੇ ਸਾਰੇ ਛੋਟੇ ਮਹਿਕਮੇਂ

ਤੇਰਾ ਲੋਂਗ ਕਰੇ ਸਰਦਾਰੀ

ਥਾਨੇਦਾਰੀ ਨੁਕਰਾ ਕਰੇ

ਚੌਕੀਦਾਰਨੀ ਬਣੀ ਬਘਿਆੜੀ

ਤੀਲੀ ਬਣੀ ਟਹਿਲਦਾਰਨੀ

ਕੰਢੀ, ਹੱਸ ਦਾ ਪੈ ਗਿਆ ਝਗੜਾ

ਤਵੀਤ ਉਗਾਹੀ ਜਾਣਗੇ

ਬੁੰਦੇ ਬਣ ਗਏ ਵਕੀਲ ਵਲੈਤੀ

ਚੌਂਕ ਚੰਦ ਨਿਆਂ ਕਰਦੇ

ਦਫ਼ਾ ਤਿੰਨ ਸੌ ਆਖਦੇ ਤੇਤੀ

ਕੰਠੀ ਨੂੰ ਸਜ਼ਾ ਬੋਲ ਗਈ

ਹਾਰ ਦੇ ਗਿਆ ਜ਼ਮਾਨਤ ਪੂਰੀ

ਕੰਠੀ ਨੂੰ ਛੁਡਾ ਕੇ ਲੈ ਗਿਆ

ਨਾਮ ਬਣ ਕੇ ਬੜਾ ਪਟਵਾਰੀ

ਹਿੱਕ ਵਾਲੀ ਮਿਣਤੀ ਕਰੇ

ਤੇਰਾ ਚੂੜਾ ਰਸਾਲਾ ਪੂਰਾ

ਬਾਜੂ-ਬੰਦ ਬਿਗੜ ਗਏ

ਪਰੀ-ਬੰਦ ਅੰਗਰੇਜ਼ੀ ਗੋਰੇ

ਫ਼ੌਜ ਦੇ ਵਿਚਾਲੇ ਸਜਦੇ

ਤੇਰੀ ਜੁਗਨੀ ਘੜੀ ਦਾ ਪੁਰਜਾ

ਜੰਜੀਰੀ ਤਾਰ ਬੰਗਲੇ ਦੀ

ਇਹ ਝਾਂਜਰਾਂ ਤਾਰ ਅੰਗਰੇਜ਼ੀ

ਮਿੰਟਾਂ 'ਚ ਦੇਣ ਖ਼ਬਰਾਂ

ਤੇਰੇ ਤੋੜੇ ਪਏ ਦੇਣ ਮਰੋੜੇ

ਬਈ ਆਸ਼ਕ ਲੋਕਾਂ ਨੂੰ

ਬਾਂਕਾਂ ਤੇਰੀਆਂ ਮਾਰਦੀਆਂ

ਹਾਕਾਂ

ਖਰਚਾਂ ਨੂੰ ਬੰਦ ਕਰਦੇ

ਜੈਨਾਂ-ਜੈਨਾਂ

ਨਿਤ ਦੇ ਨਸ਼ਈ ਰਹਿਣਾ

ਨੀ ਝੂਠੇ ਫੈਸ਼ਨ ਤੋਂ ਕੀ ਲੈਣਾ