ਹੰਸ ਫੇਰੀ

ਆਕਾਸ਼ ਵਿਚ ਉਡੰਦੇ ਹੰਸ ਨੂੰ ਦੇਖਕੇ:

ਆ ਜਾ ਓ ਤਰਨ ਵਾਲੇ

ਠੁਮਕੇ ਤੂੰ ਤੁਰਨ ਵਾਲੇ

ਅਰਸ਼ਾਂ ਦੀ ਤਾਰੀਆਂ ਲੈ

ਉੱਡਣ ਤੂੰ ਵਾਲਿਆ ਵੇ! 1.

ਉੱਡਣ ਨ ਜਾਚ ਮੈਨੂੰ,

ਤੁਰਦੀ ਹਾਂ ਡਗ-ਮਗਾਕੇ,

ਤਰਨਾਂ ਨ ਆਇ ਮੈਨੂੰ

ਤਾਰਨ ਹੇ ਵਾਲਿਆ ਵੇ ! 2.

ਕੋਈ ਨ ਜਾਚ ਆਈ,

ਸਿੱਖ੍ਯਾ ਨ ਕੋਇ ਸਿੱਖੀ,

ਸਭਨਾਂ ਗੁਣਾਂ ਤੋਂ ਖਾਲੀ,

ਸਭ ਗੁਣਨ ਵਾਲਿਆ ਵੇ! 3.

ਦਰਸ਼ਨ ਹੀ ਦੇ ਦੇ ਅਪਨਾ

ਹੇ ਉੱਜਲਾਂ ਦੇ ਉੱਜਲ!

ਬੈਠੀ ਉਡੀਕਦੀ ਹਾਂ

ਮਿਹਰਾਂ ਹੇ ਵਾਲਿਆ ਵੇ! 4.

ਆਖਣ ਏ ਜੋਗੀ ਹੋ ਜਾਂ

'ਦਰਸ਼ਨ ਮੈਂ ਮਿਲ ਗਏ ਸਨ

ਤੈਂ ਹੰਸ ਦੇ ਸੁਹਾਵੇ'

ਫਬਨਾਂ ਹੇ ਵਾਲਿਆ ਵੇ ! 5.