ਮੇਰੇ ਚੱਪੇ ਲਗ ਰਹੇ ਹਨ
ਮੇਰੇ ਚੱਪੇ ਲਗ ਰਹੇ ਹਨ।
ਪਾਣੀਆਂ ਦੀ ਛਾਤੀ ਤੇ ਮੇਰੀ ਕਿਸ਼ਤੀ ਤੁਰੀ ਜਾ ਰਹੀ ਹੈ,
ਹੌਲੇ ਹੌਲੇ, ਸਹਿਜੇ ਸਹਿਜੇ, ਰੁਮਕੇ ਰੁਮਕੇ।
ਦਿਨ ਢਲ ਗਿਆ
ਚੱਪੇ ਲਗ ਰਹੇ ਹਨ, ਕਿਸ਼ਤੀ ਚਲ ਰਹੀ ਹੈ,
ਹਾਂ ਕਿੱਥੇ ਕੁ ?
ਸ਼ਾਮਾਂ ਪੈ ਗਈਆਂ, ਕਿਸ਼ਤੀ ਚਲ ਰਹੀ ਹੈ,
ਮੇਰੇ ਚੱਪਿਆਂ ਦੇ ਪਾਣੀ ਨਾਲ ਲਗਣ ਦੀ ਅਵਾਜ਼
ਕਹਿ ਰਹੀ ਹੈ:
ਚਲ, ਚਲ, ਚਲ, ਚਲ।
ਹਨੇਰਾ ਹੋ ਗਿਆ।
ਦੂਰ ਦੂਰ ਕਿਤੇ ਕਿਤੇ ਦੀਵੇ ਟਿਮਕਦੇ ਹਨ।
ਚੱਪੇ ਲਗ ਰਹੇ ਹਨ, ਕਿਸ਼ਤੀ ਚਲ ਰਹੀ ਹੈ, ...
ਅਜੇ ਚਲੀ ਜਾ ਰਹੀ ਹੈ
ਦਾਤਾ! ਕਿੱਥੇ ਕੁ ?
ਤਾਰੇ ਚੜ੍ਹ ਆਏ, ਪਾਣੀਆਂ ਵਿਚ ਉਤਰ ਆਏ,
ਹਵਾ ਰੁਮਕ ਪਈ,
ਤਾਰੇ ਪਾਣੀਆਂ ਨਾਲ ਖੇਲਦੇ ਹਨ, ਮੇਰੀ ਕਿਸ਼ਤੀ ਦੀ
ਚਾਲ ਤੋਂ ਬੇਪਰਵਾਹ ਹਨ।
