ਕਿਸਮਤ
ਗੁੰਮੇ ਮੰਜ਼ਿਲ ਨੂੰ ਜਾਣ ਵਾਲੇ ਰਸਤੇ
ਅਸਾਂ ਨੇ ਜੋ-ਜੋ ਮਿੱਥੇ ਸੀ
ਰੱਬ ਕਿਸਮਤ ਵੰਡਦਾ ਸੀ
ਜਦੋਂ ਖੌਰੇ ਮੈਂ ਓਦੋਂ ਕਿੱਥੇ ਸੀ
ਸਾਡੇ ਬੂਹੇ ਉੱਤੇ ਦੁੱਖਾਂ ਦੇ ਬਸੇਰੇ
ਤਾਂ ਖੁਸ਼ੀ ਘਰ ਆਈ ਨਾ
ਸਾਡੇ ਹੱਥ ਮੱਥੇ ਜਿੰਨੀਆਂ ਲਕੀਰਾਂ
ਕਦੇ ਕੋਈ ਕੰਮ ਆਈ ਨਾ
ਵਾਰੋ ਵਾਰੀ ਖੂਨ ਹੋਇਆ ਖਾਬਾਂ ਦਾ
ਅੱਖਾਂ ਨੇ ਜੋ ਜੋ ਡਿੱਠੇ ਸੀ
ਰੱਬ ਕਿਸਮਤ ਵੰਡਦਾ ਸੀ ਜਦੋਂ
ਖੌਰੇ ਮੈਂ ਓਦੋਂ ਕਿੱਥੇ ਸੀ
ਲਾਈਆਂ ਨਾ ਕਿਸੇ ਵੀ ਕਦੇ ਮਲ੍ਹਮਾਂ
ਤੇ ਸੁੱਖਾਂ ਕੋਲੋਂ ਰਹੇ ਸੱਖਣੇ
ਦੇਦੇ ਖੁਸ਼ੀਆਂ ਰੱਬਾ ਵੇ ਭਰ-ਭਰਕੇ
ਚਾਹੁੰਦੇ ਨੇ ਸਾਡੇ ਬੁੱਲ੍ਹ ਹੱਸਣੇ
ਸਾਨੂੰ ਕਦੇ ਵੀ ਨਾ ਮਿਲੀ ਤੇਰੀ ਹਾਮੀ
ਮੈਂ ਟੇਕੇ ਬੜੇ ਮੱਥੇ ਸੀ
ਰੱਬ ਕਿਸਮਤ ਵੰਡਦਾ ਸੀ ਜਦੋਂ
ਖੌਰੇ ਮੈਂ ਓਦੋਂ ਕਿੱਥੇ ਸੀ
