ਏਥੇ ਬੋਲਣ ਦੀ ਨਹੀਂ ਜਾਹ ਅੜਿਆ (ਕਾਫੀ)

੧. ਚੌੜਾ ਦਰਯਾ, ਡੂੰਘਾ ਪਾਣੀ,

ਰਾਤ ਹਨੇਰੀ, ਘੁੰਮਣਵਾਣੀ,

ਬੇੜੀ ਛੇਕੋ ਛੇਕ ਪੁਰਾਣੀ

ਰਿਸ਼ਵਤਖੋਰ ਮਲਾਹ ਅੜਿਆ ।

੨. ਜੀਭ ਤੇ ਜੰਦਰਾ, ਪੈਰੀਂ ਬੇੜੀ,

ਸੱਚ ਆਖਣ ਦੀ ਵਾਹੇ ਨ ਮੇਰੀ,

ਦਾਵੇਦਾਰਾਂ ਦੇ ਹਥ ਮਿਸਲਾਂ,

ਹਾਕਮ ਬੇਪਰਵਾਹ ਅੜਿਆ।

੩. ਰਬ ਦੀ ਹੁਰਮਤ ਦੇ ਰਖਵਾਲੇ,

ਛੁਰਿਆਂ ਤੇ ਕਿਰਪਾਨਾਂ ਵਾਲੇ,

ਫਤਵੇ ਸਾਂਭੀ ਫਿਰਨ ਦੁਆਲੇ,

ਸੁਕਿਆ ਰਹਿੰਦਾ ਏ ਸਾਹ ਅੜਿਆ ।

੪. ਰਬ ਖ਼ਬਰੇ ਮੈਨੂੰ ਮਿਲ ਹੀ ਪੈਂਦਾ,

ਮਿੰਨਤ ਨਾਲ ਮਨਾ ਭੀ ਲੈਂਦਾ,

ਪਰ ਬੇਤਰਸ ਮਸੰਦ ਮਜਾਉਰ,

ਰੋਕੀ ਬੈਠੇ ਰਾਹ ਅੜਿਆ ।

੫. ਹਮਸਾਏ ਦਾ ਮੋਢਾ ਫੜ ਕੇ,

ਕੀ ਹਾਸਲ ਸੁਰਗਾਂ ਵਿਚ ਵੜ ਕੇ,

ਅਪਣੇ ਪੈਰੀਂ ਤੋੜ ਚੜ੍ਹਨ ਦੀ,

ਦਿਲ ਵਿਚ ਰਹਿੰਦੀ ਏ ਚਾਹ ਅੜਿਆ।