ਆ ਸਜਣੀ

੧. ਘੁਟ ਘੁਟ ਕੇ ਫੜੀਆਂ ਡੋਰਾਂ ਨੂੰ,

ਨਾ ਰਿਸ਼ਮਾਂ ਵਾਂਗ ਵਧਾ ਸਜਣੀ,

ਦਰਸ਼ਨ ਮੇਲੇ ਦੀਆਂ ਘੜੀਆਂ ਨੂੰ

ਨਾ ਅਗਾਂਹ ਅਗਾਂਹ ਤਿਲਕਾ ਸਜਣੀ।

੨. ਤੂੰ ਕਦ ਮੇਰੇ ਘਰ ਆਵੇਂ ਗੀ?

ਕਦ ਗਲ ਲਾ ਕੇ ਅਪਣਾਵੇਂ ਗੀ?

ਕਿਤੇ ਮੁਕ ਨਾ ਜਾਣ ਉਡੀਕਾਂ ਏਹ,

ਝਬ ਆ ਸਜਣੀ, ਝਬ ਆ ਸਜਣੀ ।

੩. ਗਲ ਲੱਗਣ ਨੂੰ ਜੀ ਕਰਦਾ ਹੈ,

ਪਰ ਬੇ ਅਦਬੀ ਤੋਂ ਡਰਦਾ ਹੈ,

ਵਿਚਕਾਰ ਖਲੋਤੇ ਪੜਦੇ ਨੂੰ

ਤੂੰ ਆਪੀਂ ਪਰੇ ਹਟਾ ਸਜਣੀ ।

੪. ਮੇਰੀ ਬਾਂਹ ਫੜਨ ਲਈ ਬਾਂਹ ਕਰ ਦੇ,

ਮੇਰੇ ਬਹਿਣ ਲਈ ਕੋਈ ਥਾਂ ਕਰ ਦੇ,

ਮੇਰੇ ਪੈਰ ਬਿੜਕਦੇ ਜਾਂਦੇ ਨੀਂ

ਜ਼ਰਾ ਉੜ ਕੇ ਉਤਾਂਹ ਉਠਾ ਸਜਣੀ ।