ਮੁਖ-ਬੰਧ
(ਦੂਜਾ ਐਡੀਸ਼ਨ ਛਪ ਆਉਣੇ ਤੇ)
'ਪ੍ਰਸਿੱਧ ਸਿੱਖ ਬੀਬੀਆਂ' ਲਿਖਣ ਦਾ ਮੰਤਵ ਇਹ ਸੀ ਕਿ ਇਤਿਹਾਸ ਦੇ ਉਨ੍ਹਾਂ ਪੰਨਿਆਂ ਨੂੰ ਉਜਾਗਰ ਕੀਤਾ ਜਾਵੇ ਜੋ ਸੁਨਹਿਰੀ ਤਾਂ ਸਨ ਪਰ ਚਮਕ ਨਹੀਂ ਰਹੇ ਸਨ । ਜਦ ਇਕ ਇਕ ਪੰਨੇ ਨੂੰ ਪੜਿਆ ਉਹ ਕੁੰਦਨ ਵਾਂਗ ਚਮਕਣ ਲਗ ਪਏ । ਉਹ ਰੌਸ਼ਨੀ ਜਦ ਪਾਠਕਾਂ ਤਕ ਪਹੁੰਚੀ ਤਾਂ ਉਨ੍ਹਾਂ ਦੀਆਂ ਅੱਖਾਂ ਨੂੰ ਵੀ ਇਕ ਨਿਰਾਲੀ ਚਮਕ ਦੇਖਣ ਨੂੰ ਮਿਲੀ । ਸੋ ਪੁਸਤਕ ਦਾ ਪਹਿਲਾ ਐਡੀਸ਼ਨ ਪਹਿਲੇ ਸਾਲ ਹੀ ਮੁੱਕ ਜਾਣਾ ਜਿਥੇ ਪਾਠਕਾਂ ਦਾ ਪਿਆਰ ਦਰਸਾਂਦਾ ਹੈ ਉਥੇ ਮੇਰਾ ਉਤਸ਼ਾਹ ਹੋਰ ਵਧਾਂਦਾ ਹੈ ।
ਨਵੇਂ ਐਡੀਸ਼ਨ ਵਿਚ ਕੁਝ ਨਵੇਂ ਲੇਖ: ਮਾਈ ਭਾਗੋ ਅਤੇ ਰਾਣੀ ਸਦਾ ਕੌਰ ਜੋ ਦੋਵੇਂ ਹੀ ਇਤਿਹਾਸ ਦਾ ਜ਼ਰੂਰੀ ਹਿੱਸਾ ਹਨ, ਨੂੰ ਦੂਜੇ ਐਡੀਸ਼ਨ ਵਿਚ ਲੇਖਾਂ ਦੀ ਲੜੀ ਵਿਚ ਪਰ ਦਿਤਾ ਹੈ। ਕੁਝ ਨਵੀਆਂ ਸੋਧਾਂ ਵੀ ਕੀਤੀਆਂ ਹਨ ਜੋ ਪਾਠਕਾਂ ਨੂੰ ਪੜ੍ਹਨ ਤੇ ਹੀ ਪਤਾ ਲੱਗੇਗਾ ।
ਪੁਸਤਕ ਦਾ ਇੰਜ ਨਵਾਂ ਐਡੀਸ਼ਨ ਆ ਜਾਣਾ ਮੇਰਾ ਉਤਸ਼ਾਹ ਹੋਰ ਵਧਾਉਂਦਾ ਹੈ। ਮੈਨੂੰ ਉਮੀਦ ਹੈ ਪਾਠਕ ਮੇਰਾ ਉਤਸ਼ਾਹ ਇਸੇ ਤਰ੍ਹਾਂ ਨਾਲ ਵਧਾਉਂਦੇ ਰਹਿਣਗੇ। ਕੁਝ ਪੁਸਤਕਾਂ ਦੇ ਹੋਰ ਮਸੌਦੇ ਵੀ ਤਿਆਰ ਹਨ । ਮੈਨੂੰ ਉਮੀਦ ਹੈ ਪਾਠਕ ਇਨ੍ਹਾਂ ਸਾਰਿਆਂ ਨੂੰ ਵੀ ਭਰਪੂਰ ਸ਼ਲਾਘਾ ਦੇਣਗੇ । ਪਾਪਾ ਕਹਿੰਦੇ ਹਨ ਕਿ ਚੰਗੀ ਪੁਸਤਕ ਉਹੀ ਹੈ ਜੋ ਅੰਗਰੇਜ਼ੀ ਦੀ ਇਕ ਕਹਾਵਤ ਅਨੁਸਾਰ ਤਾਜ਼ੇ ਕੇਕ ਦੀ ਤਰ੍ਹਾਂ ਵਿਕ ਜਾਵੇ। ਮੇਰੀ ਪੁਸਤਕ ਦਾ ਸਵਾਦ ਇਸੇ ਤਰ੍ਹਾਂ ਪਾਠਕਾਂ ਨੇ ਮਾਣਿਆ ਹੈ । ਮੈਨੂੰ ਖ਼ੁਸ਼ੀ ਹੁੰਦੀ ਹੈ ਜਦ ਹਰ ਲਾਇਬਰੇਰੀ, ਪ੍ਰਦਰਸ਼ਨੀ ਵਿਚ ਅਤੇ ਇਸਤਰੀਆਂ ਦੇ ਹੱਥ ਆਪਣੀ ਪੁਸਤਕ ਦੇਖਦੀ ਹਾਂ।
ਪਾਠਕਾਂ ਵਲੋਂ ਮਿਲੇ ਭਰਪੂਰ ਉਤਸ਼ਾਹ ਲਈ ਮੈਂ ਉਨ੍ਹਾਂ ਦਾ ਇਕ ਵਾਰੀ ਫਿਰ ਦਿਲੀ ਧੰਨਵਾਦੀ ਹਾਂ। ਇਕ ਉਚੇਚਾ ਧੰਨਵਾਦ ਮੈਂ ਸਰਦਾਰ ਪਰਵਿੰਦਰ ਸਿੰਘ ਜੀ ਦਾ ਜ਼ਰੂਰ ਕਰਨਾ ਹੈ ਜਿਨ੍ਹਾਂ ਮੇਰੇ ਉਤਸ਼ਾਹ ਨੂੰ ਮੱਠਾ ਨਹੀਂ ਪੈਣ ਦਿੱਤਾ।
2046,ਰਾਣੀ ਬਾਗ,
ਨਵੀਂ ਦਿੱਲੀ ਸਿਮਰਨ ਕੌਰ ਜੂਨ 1993
