(4)

ਚੋਰੋ, ਵੇ ਚੋਰੋ!

ਆਪਣਾ ਮਾਲ ਵੰਡਣ ਲਈ

ਕਿਤੇ ਬਾਹਰ ਜਾ ਕੇ ਲੜੋ

ਜਾਗ ਹੀ ਨਾ ਉੱਠਣ ਮਤਾਂ ਘਰ ਵਾਲ਼ੇ

ਸੁਣਿਆ

ਬੁਰੀ ਹੁੰਦੀ ਹੈ ਵਾਹਰ ਦੀ ਕੁੱਟ...

(5)

ਉਹ ਰੇਡੀਓ ਨਹੀਂ ਸੁਣਦੇ

ਅਖ਼ਬਾਰਾਂ ਨਹੀਂ ਪੜ੍ਹਦੇ

ਜਹਾਜ਼ ਖੇਤਾਂ ਵਿੱਚ ਹੀ ਦੇ ਜਾਂਦੇ ਨੇ ਖ਼ਬਰ ਸਾਰ

ਮੁੰਨੇ ਨੂੰ ਮੁੱਠ ਵਿੱਚ ਘੁੱਟ ਕੇ

ਉਹ ਕੇਵਲ ਹੱਸ ਛੱਡਦੇ ਹਨ

ਕਿਉਂਕਿ ਉਹ ਸਮਝਦੇ ਹਨ

ਕਿ ਹਲ੍ਹ ਦੀ ਵੇਲ ਕਮਲੀ ਨਹੀਂ

ਕਮਲੀ ਤਾਂ ਤੋਪ ਹੁੰਦੀ ਹੈ

(6)

ਅਸੀਂ ਹਨ੍ਹੇਰੀ ਨੁੱਕਰ ਦੇ ਵਿੱਚ

ਗੁੰਮ ਸੁੰਮ ਬੈਠੇ ਸੋਚ ਰਹੇ ਹਾਂ

ਹੋਰ ਘੜੀ ਤਾਈਂ ਚੰਨ ਚੜ੍ਹੇਗਾ

ਭੁਰਿਆ ਭੁਰਿਆ

ਖੁੱਸਿਆ ਖੁੱਸਿਆ

ਤਾਂ ਬੱਚਿਆਂ ਨੂੰ ਆਖਾਂਗੇ

ਐਸ ਤਰ੍ਹਾਂ ਦਾ ਚੰਨ ਹੁੰਦਾ ਏ ?

***

(9.12.1971)