22
ਸਾਡਾ ਹੱਕ ਨਈਂ ਦੇਂਦੇ ਜਿਹੜੇ, ਐਸੀ ਤੈਸੀ ਉਹਨਾਂ ਦੀ।
ਹੋਣ ਨਈਂ ਦੇਂਦੇ ਖੁੱਲ੍ਹੇ ਵਿਹੜੇ, ਐਸੀ ਤੈਸੀ ਉਹਨਾਂ ਦੀ।
ਦਿਲ ਦੀ ਬੋਟੀ ਲੈ ਕੇ ਵੀ ਨਈ, ਰੱਜੀ ਨੀਯਤ ਜਿਹਨਾਂ ਦੀ,
ਭਾਵੇਂ ਹੱਥੀਂ ਆਪ ਸਹੇੜੇ ਐਸੀ ਤੈਸੀ ਉਹਨਾਂ ਦੀ।
ਵੰਡਾਂ ਵਾਲੀਆਂ ਲੀਕਾਂ ਖਿੱਚਣ, ਜਿਹੜੇ ਆਦਮ ਜਾਇਆਂ ਨੂੰ,
ਉਹ ਸ਼ੈਤਾਨੀ ਚਰਖੇ ਕਿਹੜੇ, ਐਸੀ ਤੈਸੀ ਉਹਨਾਂ ਦੀ।
ਸਾਨੂੰ ਅਮਨ ਦੀ ਗੁੜ੍ਹਤੀ ਦੇ ਕੇ, ਬੰਨ੍ਹਿਆਂ ਸਾਡੇ ਵੱਡਿਆਂ ਨੇ,
ਨਈਂ ਤਾਂ ਜਿਹੜੇ ਕਹਿਣ ਮਰੇੜੇ, ਐਸੀ ਤੈਸੀ ਉਹਨਾਂ ਦੀ।
ਨਾਂ ਤੇ ਮੇਰਾ ਵੀ ਏ ਰਾਂਝਾ, ਪਰ ਮੈਂ ਵੰਝਲੀ ਵਾਲਾ ਨਈਂ,
ਢੁੱਕਣ ਤੇ ਸਹੀ ‘ਬਾਬਾ' ਖੇੜੇ, ਐਸੀ ਤੈਸੀ ਉਹਨਾਂ ਦੀ।
-0-
