5
ਕਿਸਰਾਂ ਖਿੱਚਾਂ ਮੈਂ ਤਸਵੀਰਾਂ ਸ਼ਹਿਰ ਦੀਆਂ।
ਪਾਟੇ ਖਿੱਦੋ ਵਾਂਗੂੰ ਲੀਰਾਂ ਸ਼ਹਿਰ ਦੀਆਂ।
ਮੈਨੂੰ ਸ਼ਹਿਰ 'ਚੋਂ ਕੱਢਣ ਲੱਗਿਆਂ ਸੋਚ ਲਵੋ,
ਕੌਣ ਕਰੇਗਾ ਫੇਰ ਤਹਿਮੀਰਾਂ ਸ਼ਹਿਰ ਦੀਆਂ।
ਸੁਫਨਾ ਵੀ ਤੇ ਪਹਿਲਾਂ ਮੈਨੂੰ ਆਇਆ ਸੀ,
ਮੈਂ ਦੱਸੀਆਂ ਸਨ ਫੇਰ ਤਹਿਬੀਰਾਂ ਸ਼ਹਿਰ ਦੀਆਂ।
ਰਸਮਾਂ ਵਾਲੇ ਜਦ ਤੱਕ ਬੁਰਜ ਨਾ ਤੋੜਾਂਗੇ,
ਰੋਂਦੇ ਰਹਿਣਗੇ ਰਾਂਝੇ ਹੀਰਾਂ ਸ਼ਹਿਰ ਦੀਆਂ।
ਜਿਹੜੇ ਸ਼ਹਿਰ 'ਚ ਰਾਤੀਂ ਕੀੜੀ ਦਿਸਦੀ ਸੀ,
ਕਿੱਧਰ ਗਈਆਂ ਉਹ ਤਨਵੀਰਾਂ ਸ਼ਹਿਰ ਦੀਆਂ।
ਉਹੋ ਪੀੜ ਮਨਾਉਂਦਾ ਇਹਦੇ ਢੱਠਣ 'ਤੇ,
ਹੱਥੀਂ ਕਰਦਾ ਜੋ ਤਹਿਮੀਰਾਂ ਸ਼ਹਿਰ ਦੀਆਂ।
ਰਲ ਕੇ ਪੁੱਛੀਏ ਆਪਣੇ ਸ਼ਹਿਰ ਦੇ ਰਾਖੇ ਨੂੰ,
ਕੀਹਦੀ ਛਹਿ 'ਤੇ ਹੋਈਆਂ ਲੀਰਾਂ ਸ਼ਹਿਰ ਦੀਆਂ।
-0-
