29. ਨਵਾਂ ਸਾਲ
ਖ਼ੈਰ ਦਾ ਚੰਨ ਚੜ੍ਹਾਵੀਂ ਨਵਿਆਂ ਸਾਲਾ ਤੂੰ।
ਪਿਛਲੇ ਵਾਂਗ ਨਾ ਜਾਂਵੀਂ ਨਵਿਆਂ ਸਾਲਾ ਤੂੰ।
ਲਿਖੀ ਜਾਵੇ ਫਿਰ ਨਾ ਕੋਈ ਤਾਰੀਖ ਨਵੀਂ,
ਜ਼ਾਲਮ ਨੂੰ ਸਮਝਾਵੀਂ ਨਵਿਆਂ ਸਾਲਾ ਤੂੰ।
ਦਹਿਸ਼ਤ ਵਹਿਸ਼ਤ ਖਿਲਰੀ ਵਿੱਚ ਜ਼ਮਾਨੇ ਦੇ,
ਭੈੜੇ ਰੰਗ ਮੁਕਾਵੀਂ ਨਵਿਆਂ ਸਾਲਾ ਤੂੰ ।
ਸੁਣ ਸੁਣ ਬੰਬ ਧਮਾਕੇ, ਬੋਲੇ ਹੋ ਗਏ ਆਂ,
ਉੱਚਾ ਸੁਰ ਨਾ ਲਾਵੀਂ ਨਵਿਆਂ ਸਾਲਾ ਤੂੰ।
ਬੜੀ ਉਦਾਸੀ ਦਿੱਤੀ ਪਿਛਲੇ ਸਾਲਾਂ ਨੇ,
ਹਾਸੇ ਵੰਡਦਾ ਆਵੀਂ ਨਵਿਆਂ ਸਾਲਾ ਤੂੰ।
ਜਿਹੜੇ ਜਿਹੜੇ ਜੰਗ ਨੇ ਸ਼ਹਿਰ ਉਜਾੜੇ ਨੇ,
ਸਾਰੇ ਸ਼ਹਿਰ ਵਸਾਵੀਂ ਨਵਿਆਂ ਸਾਲਾ ਤੂੰ।
ਪੈਰ ਧਰਨ ਨੂੰ ਥਾਂ ਨਾ ਲੱਭੇ ਨਫਰਤ ਨੂੰ,
ਐਨਾ ਪਿਆਰ ਉਗਾਵੀਂ ਨਵਿਆਂ ਸਾਲਾ ਤੂੰ।
ਲੋੜ ਪਵੇ ਜੇ ਕਿਧਰੇ ਬੁਝਦੇ ਦੀਵੇ ਲਈ,
ਮੇਰਾ ਲਹੂ ਲੈ ਜਾਵੀਂ, ਨਵਿਆਂ ਸਾਲਾ ਤੂੰ।
ਨੀਵਾਂ ਸਿਰ ਨਾ ਹੋਵੇ, ਕਿਧਰੇ ਸੱਚੇ ਦਾ,
ਝੂਠੇ ਸਿਰ ਖੇਹ ਪਾਵੀਂ ਨਵਿਆਂ ਸਾਲਾ ਤੂੰ।
'ਬਾਬਾ ਨਜਮੀਂ' ਵਾਂਗੂੰ ਤੂੰ ਵੀ ਲੋਕਾਂ ਲਈ,
ਹੱਕ ਦਾ ਢੋਲ ਵਜਾਵੀਂ ਨਵਿਆਂ ਸਾਲਾ ਤੂੰ।
-0-
