ਕਵਿਤਾਵਾਂ

1. ਹੋਕਾ

ਉੱਠ ਕਬਰ 'ਚੋਂ 'ਵਾਰਸ', 'ਬੁੱਲ੍ਹਿਆ'

'ਮੀਆਂ ਮੁਹੰਮਦ' ਬਖਸ਼ਾ ਜਾਗ,

ਅੱਪੜ 'ਬਾਹੂ', ਬਹੁੜ 'ਹੁਸੈਨਾ'

ਲਹਿਜਿਆਂ ਦੇ ਫੜ ਹੱਥੀਂ ਟੋਕੇ

ਥਾਓਂ ਥਾਈਂ ਉੱਠ ਖਲੋਤੇ

ਵੱਡਿਓ! ਖੇਡ ਵਿਗਾੜਨ ਲੱਗੇ

ਮੇਲਾ ਫੇਰ ਉਜਾੜਨ ਲੱਗੇ

 

ਸਦੀਆਂ ਦਾ ਪੰਜਾਬ ਤੁਹਾਡਾ

ਫੇਰ ਇੱਕ ਵਾਰੀ ਵੰਡਨਾ ਚਾਹੁੰਦੇ

ਰੱਖ ਬੰਦੂਕਾਂ ਤੁਹਾਡੇ ਮੋਢੇ

ਆਪਣਾ ਕੱਦ ਵਧਾਣਾ ਚਾਹੁੰਦੇ

ਕੱਢ ਤੁਹਾਨੂੰ ਵਿੱਚ ਸਮੁੰਦਰੋਂ

ਛੱਪੜੀਂ ਝੱਲੇ ਪਾਉਣਾ ਚਾਹੁੰਦੇ

ਆਪਣਾ ਨਾਂ ਚਮਕਾਉਣਾ ਚਾਹੁੰਦੇ

 

ਇਹ ਮੈਂ ਕਿੰਝ ਨਜ਼ਾਰਾ ਵੇਖਾਂ

ਚੰਨ ਦੇ ਬਦਲੇ ਤਾਰਾ ਵੇਖਾਂ

ਸਾਡਾ ਵਿਰਸਾ ਮੁੱਖ ਤੁਸੀਂ

ਸਾਡੇ ਸਿਰ ਦੇ ਰੁੱਖ ਤੁਸੀਂ

ਨਵੇਂ ਮਦਾਰੀ ਆਏ ਨੇ ਤੱਕੋ

ਜੀਕਣ ਡੱਕੇ ਜਾਂਦੇ ਡੱਕੋ

ਅਜੇ ਤੇ ਪਿਛਲੀ ਵੰਡ ਨਈਂ ਭੁੱਲੀ।

ਬੂਥੇ ਵੱਜੀ ਚੰਡ ਨਈਂ ਭੁੱਲੀ।

-0-