7
ਜੁੱਸੇ ਉੱਤੇ ਛਾਪੇ ਜਿਹੜੇ, ਇਹ ਨੇ ਅੱਖਰ ਨੀਲਾਂ ਦੇ।
ਵੇਖ ਕੇ ਟੁਰ ਜਾ, ਚੰਗਾ ਰਏਂਗਾ, ਜਾਹ ਨਾ ਵਿੱਚ ਤਫਸੀਲਾਂ ਦੇ।
ਘਰ ਦੇ ਘੜੇ 'ਚੋਂ ਪਾਣੀ ਪਾ ਕੇ ਜਿਹੜਾ ਬਾਲ ਨਾ ਪੀਂਦਾ ਏ,
ਕਿਸਰਾਂ ਭਰ ਭਰ ਉਹ ਪਾਵੇਗਾ ਮਸ਼ਕਾਂ ਵਿੱਚ ਸ਼ਬੀਲਾਂ ਦੇ।
ਖੌਰੇ ਕਿਹੜਾ ਕਰਜ਼ਾ ਦੇਣਾ, ਸ਼ਹਿਰ 'ਚ ਆਵਣ ਵਾਲੇ ਦਾ,
ਬੰਦੇ ਇੰਜ ਖਲੋਤੇ ਹੋਏ, ਪੱਥਰ ਜਿਸਰਾਂ ਮੀਲਾਂ ਦੇ।
ਉੱਚੇ ਮਹਿਲਾਂ ਥੱਲੇ ਵੇਖਾਂ ਜਦ ਵੀ ਮੰਗਣ ਵਾਲੇ ਨੂੰ,
ਅੱਚਣ ਚੇਤੀ ਚੇਤੇ ਆਉਂਦੇ, ਉੱਚੇ ਝੁੱਗੇ ਚੀਲਾਂ ਦੇ।
ਹਿੰਮਤ ਪੈਰ ਫੜਾਵੇ ਤੈਨੂੰ ਅੱਖਾਂ ਮੀਟ ਕੇ ਫੜ ਲਈਂ ਤੂੰ,
ਉਸ ਬੇੜੀ ਨਾ ਬੈਠੀਂ ਜਿਹੜੀ ਚੱਪੂ ਦਏ ਦਲੀਲਾਂ ਦੇ।
ਓਨਾ ਚਿਰ ਤੱਕ ਤੇਰੇ ਘਰ ਦਾ, ਨ੍ਹੇਰੇ ਪਿੱਛਾ ਛੱਡਣਾ ਨਈਂ,
ਜਦ ਤੱਕ ਤੇਰੀ ਯਾਰੀ ਰਹੇਗੀ ਸੱਜਣਾ, ਨਾਲ ਬਖੀਲਾਂ ਦੇ।
ਅੱਖੀਂ ਵੇਖ ਲਵਾਂ ਨਾ ਜਿਹੜਾ ਮੈਂ ਉਹ ਸੌਦਾ ਲੈਂਦਾ ਨਈਂ,
ਭਾਵੇਂ ਤੇਰਾ ਬੰਦ ਏ ਸੋਨਾ, 'ਬਾਬਾ' ਅੰਦਰ ਸੀਲਾਂ ਦੇ।
-0-
