ਹੁਣ ਨਾ ਹੱਥ ਵਧਾਵੀਂ 'ਬਾਬਾ'

ਲਿਖਦਾ ਕਿਉਂ ਨਈਂ ਸੱਚੇ ਅੱਖਰ?

 

ਲੱਖਾਂ ਹੀਰਾਂ ਦਾਜਾਂ ਹੱਥੋਂ

ਆਪਣੇ ਘੜੇ ਰਿਵਾਜਾਂ ਹੱਥੋਂ

ਸੂਟ ਸੁਹਾਣੇ ਪਾ ਨਈਂ ਸਕੀਆਂ

ਡੋਲੀ ਤੀਕਰ ਜਾ ਨਈਂ ਸਕੀਆਂ

ਸੱਧਰਾਂ ਵਾਲੇ ਪਲੰਗਾਂ ਉੱਤੋਂ

ਸ਼ਗਨਾਂ ਵਾਲੇ ਫੁੱਲਾਂ ਬਦਲੇ

ਬੇਬਸੀਆਂ ਦੇ ਝਾੜਨ ਕੰਡੇ

ਭਰ ਭਰ ਹਉਕੇ ਠੰਢੇ ਠੰਢੇ

ਟੁਰ ਪਈਆਂ ਨੇ ਵੱਲ ਬੁੜ੍ਹਾਪੇ

ਕੰਧੀਂ ਲੱਗੇ ਰੋਂਦੇ ਮਾਪੇ

ਲਿਖਦਾ ਕਿਉਂ ਨਈਂ ਸੱਚੇ ਅੱਖਰ?

 

ਧਰਤੀ ਦੇ ਪ੍ਰਧਾਨ ਬੁਲਾ

ਉਹਨੂੰ ਤੂੰ ਇਨਸਾਨ ਵਿਖਾ

ਆਪਣੇ ਸਿਆਸਤਦਾਨ ਬੁਲਾ

ਆਪਣਾ ਪਾਕਿਸਤਾਨ ਵਿਖਾ

ਮਜ਼ਹਬੀ ਠੇਕੇਦਾਰ ਬੁਲਾ

ਨਫ਼ਰਤ-ਭਰੇ ਬਾਜ਼ਾਰ ਵਿਖਾ

 

ਝੂਠੇ ਖਿਦਮਤਗਾਰ ਬੁਲਾ

ਲੱਖਾਂ ਮੰਗਣ ਹਾਰ ਵਿਖਾ

ਪਾਰ ਦੇ ਦਾਅਵੇਦਾਰ ਬੁਲਾ

ਕਰਜ਼ੇ ਦੀ ਤਲਵਾਰ ਵਿਖਾ