10. ਰੱਬਾ ਲੱਗੀ ਜੰਗ ਹਟਾ

ਰੱਬਾ ਲੱਗੀ ਜੰਗ ਹਟਾ

ਛੇਤੀ, ਛੇਤੀ, ਛੇਤੀ ਆ

 

ਦੁਨੀਆਂ ਤੇਰੀ ਸਹਿਮੀ ਸਹਿਮੀ

ਮੁਕਦੀ ਜਾਵੇ ਗਹਿਮਾ ਗਹਿਮੀ

ਬੰਦੇ ਖਾਣੀ ਪਿੰਜਰੇ ਪਾ

 

ਧਰਤੀ ਬਾਂਝ ਬਣਾਵਣ ਲੱਗੇ

ਲੰਮੀ ਭੁੱਖ ਉਗਾਵਣ ਲੱਗੇ

ਅੱਗ ਦੇ ਗੋਲੇ ਬਰਫ ਬਣਾ

 

ਖੁਸ਼ੀਆਂ ਬਦਲੇ ਚੀਕ ਚਿਹਾੜੇ

ਜਿੱਧਰ ਵੇਖਾਂ ਪਏ ਉਜਾੜੇ

ਉੱਜੜੇ ਆਪਣੇ ਲੋਕ ਵਸਾ

 

ਵੇਖ ਮੁਹੰਮਦ ਈਸਾ ਵਾਲੇ

ਇੱਕ ਦੂਜੇ ਦੇ ਹੋਏ ਦਵਾਲੇ

ਗਿਰਜਾ ਰੱਖ, ਮਸੀਤ ਬਚਾ

 

ਡੰਗਰ ਬਣ ਗਏ ਆਦਮ-ਜਾਏ

ਬੰਦਿਆਂ ਨੇ ਬਘਿਆੜ ਭੁਲਾਏ

ਜੱਗ ਦੇ ਉੱਤੇ ਕਰਮ ਕਮਾ

 

ਚੱਲ ਗਿਆ ਜੇ ਅਸਲੀ ਅਸਲਾ

ਕੱਠਾ ਨਈਓ ਹੋਣਾ ਮਸਲਾ

ਬਲਦੀ ਉੱਤੇ ਪਾਣੀ ਪਾ

ਛੇਤੀ, ਛੇਤੀ, ਛੇਤੀ, ਆ

ਰੱਬਾ ਲੱਗੀ ਜੰਗ ਹਟਾ

-0-

 

ਸਾਂਝੇ ਪੰਜਾਬ ਦਾ ਲੋਕ-ਕਵੀ

ਬਾਬਾ ਨਜਮੀ

(ਚੋਣਵੀਂ ਕਵਿਤਾ)

 

 

ਸੰਪਾਦਨ ਤੇ ਲਿਪੀ-ਬਦਲਾਵ

ਹਰਭਜਨ ਸਿੰਘ ਹੁੰਦਲ