ਚਸਕੇ ਲੈਣ ਤੇ ਲੋਕਾਂ ਨੂੰ ਕੁਰਾਹੇ ਪਾਉਣ ਦੀ ਥਾਂ ਮਿਹਨਤ ਮੁਸ਼ੱਕਤ ਕਰਨ ਵਾਲਿਆਂ ਦੇ ਹਕੀਕੀ ਹੁਸਨ ਦੀਆਂ ਬਾਤਾਂ ਪਾਉਂਦਾ ਹੈ।
ਸ਼ਇਰੀ ਜਾਂ ਅਦਬ ਸਾਹਿਤ ਦਾ ਸੱਭ ਤੋਂ ਵੱਡਾ ਗੁਣ ਹੀ ਇਹ ਹੁੰਦਾ ਏ ਕਿ ਉਹ ਇਨਸਾਨੀ ਵਸੇਬ ਨੂੰ ਹੋਰ ਸੋਹਣੀ ਸੁਨੱਖੀ ਤੇ ਸਾਰਿਆਂ ਦੇ ਵੱਸਣ ਯੋਗ ਥਾਂ ਬਣਾਵੇ। ਕਲਮ ਦੀ ਕਲਾ ਦੀ ਵਰਤੋਂ ਕਲਮਕਾਰ ਨੇ ਜ਼ੋਰ ਜ਼ਬਰਦਸਤੀ, ਲੁੱਟ ਖਸੁੱਟ, ਨਾ ਬਰਾਬਰੀ ਤੇ ਬੇਇਨਸਾਫੀ ਖਿਲਾਫ ਡੱਟ ਕੇ ਕਰਨੀ ਹੁੰਦੀ ਏ। ਇਹ ਸਾਰਾ ਕੁਝ ਬਾਬੇ ਦੀਆਂ ਲਿਖਤਾਂ ਵਿਚੋਂ ਠਾਠਾਂ ਪਿਆ ਮਾਰਦਾ ਏ। ਇਹਨਾਂ ਦੀ ਲਿਖਤ ਦੀ ਬੋਲੀ, ਸ਼ੈਲੀ, ਲਫ਼ਜ਼ਾਵਲੀ ਤੇ ਮਜਮੂੰਨ ਪੜ੍ਹਨ ਵਾਲੇ ਨੂੰ ਝੰਜੋੜਦੇ, ਪ੍ਰੇਰਦੇ ਤੇ ਕੁਝ ਚੰਗਾ ਕਰਨ ਲਈ ਵੰਗਾਰਦੇ ਨੇ।
ਨਜਮੀ ਹੋਰਾਂ ਦੀਆਂ ਤਿੰਨ ਬੜੀਆਂ ਹੀ ਮਕਬੂਲ ਕਿਤਾਬਾਂ 'ਅੱਖਰਾਂ ਵਿੱਚ ਸਮੁੰਦਰ, 'ਸੋਚਾਂ ਵਿੱਚ ਜਹਾਨ', 'ਮੇਰਾ ਨਾਂ ਇਨਸਾਨ’, ਪਹਿਲੋਂ ਹੀ ਸ਼ਾਹਮੁਖੀ ਲਿਪੀ ਵਿੱਚ ਲਾਹੌਰੋਂ ਛੱਪ ਚੁੱਕੀਆਂ ਨੇ। ਅਸੀਂ ਸੱਥ ਵਾਲਿਆਂ ਨੇ ਇਹਨਾਂ ਤਿੰਨਾਂ ਨੂੰ ਇਕੋ ਜਿਲਦ 'ਬਾਬੇ ਨਜ਼ਮੀ ਦੀ ਚੋਣਵੀਂ ਕਵਿਤਾ' ਦੇ ਸਿਰਲੇਖ ਹੇਠ ਗੁਰਮੁਖੀ ਅੱਖਰਾਂ ਵਿੱਚ ਛਾਪਣ ਦੀ ਖੁਸ਼ੀ ਲਈ ਹੈ। ਬਾਬੇ ਹੁਰਾਂ ਨਾਲ ਵਾਅਦਾ ਤਾਂ ਅਸੀਂ ਕੋਈ ਢਾਈ ਸਾਲ ਪਹਿਲੋਂ ਕੀਤਾ ਸੀ, ਉਹਨੂੰ ਵਫ਼ਾ ਕਰਨ ਲਈ ਮੌਕਾ ਮੇਲ ਹੁਣ ਬਣਿਆ ਏ। ਏਸ ਵੇਲੇ ਦੌਰਾਨ ਅਸੀਂ ਬਾਬੇ ਦੀ ਸ਼ਾਇਰੀ ਦੀਆਂ ਰਮਜ਼ਾਂ ਨੂੰ ਸਮਝਣ ਵਾਲਾ ਕੋਈ ਉਹਦੇ ਵਰਗਾ ਨਿਧੜਕ, ਜੁਝਾਰੂ ਤੇ ਲੋਕਾਈ ਦੇ ਹੱਕਾਂ ਲਈ ਜਹਾਦ ਕਰਨ ਵਾਲਾ ਲਿਖਿਆਰ ਲੱਭਦੇ ਰਹੇ ਆਂ। ਇਹ ਘਾਟ ਸਾਡੇ ਵੱਡੇ ਵੀਰ ਮਾਂ ਬੋਲੀ ਦੇ ਸਿਰ ਕੱਢ, ਲਿਖਾਰੀ ਅਗਾਂਹ ਵੱਧੂ ਸੋਚ ਵਾਲੇ ਹਰਭਜਨ ਸਿੰਘ ਹੁੰਦਲ ਨੇ ਸਿਰਫ ਇਕ ਹਫ਼ਤੇ ਵਿੱਚ ਈ ਪੂਰੀ ਕਰਕੇ ਸਮੂਹ ਪੰਜਾਬੀਆਂ 'ਤੇ ਪਰਉਪਕਾਰ ਕੀਤਾ ਹੈ। ਲਿਪੀ ਬਦਲਾਵ ਵੇਲੇ ਬਾਬੇ ਦੀ ਇਨਸਾਨਾਂ ਵਾਲੀ ਸੋਚ ਨੂੰ ਜਹਾਨ ਸਾਹਮਣੇ ਪੇਸ਼ ਕਰਨ ਲਈ ਜਿਹੜੀ ਲਗਨ, ਮਿਹਨਤ, ਹਿੰਮਤ, ਸਿਰੜ ਤੇ ਸੂਝ ਬੂਝ ਨਾਲ ਹੁੰਦਲ ਹੋਰਾਂ ਨੇ ਇਹ ਪਹਾੜ ਜਿਡਾ ਕਾਰਜ ਨੇਪਰੇ ਚਾੜ੍ਹਿਆ ਏ, ਉਹਦੇ ਲਈ ਅਸੀਂ ਸੱਥ ਵਾਲੇ ਸਾਰੇ ਸੰਗੀ ਬੇਲੀ ਉਹਨਾਂ ਦੇ ਦਿਲੋਂ ਮਨੋਂ ਸ਼ੁਕਰਗੁਜ਼ਾਰ ਹਾਂ। ਹੁੰਦਲ ਨੇ ਉਮਰ ਭਰ ਆਪਣੀਆਂ ਮੌਲਿਕ ਕਾਵਿ ਲਿਖਤਾਂ ਅਤੇ ਦੁਨੀਆਂ ਭਰ ਦੇ ਮਹਾਨ ਕਲਮਕਾਰਾਂ ਦੀਆਂ ਰਚਨਾਵਾਂ ਨੂੰ ਪੰਜਾਬੀ ਵਿੱਚ ਉਲੱਥਾ ਕਰਕੇ ਜਿਹੜਾ ਨਾਮਣਾ ਖੱਟਿਆ ਹੈ ਉਹ ਬੇਮਿਸਾਲ ਹੈ।
ਲਾਹੌਰੀਏ ਬਾਬਾ ਨਜਮੀਂ ਦੀ ਸ਼ਇਰੀ ਨੂੰ ਗੁਰਮੁਖੀ ਜਾਮਾ ਪੁਆ ਕੇ ਹਰਭਜਨ ਸਿੰਘ ਹੁੰਦਲ ਦਾ ਇਹ ਕੰਮ ਤਵਾਰੀਖੀ ਵੀ ਏ ਤੇ ਸੱਥ ਦੀ ਸੋਚ ਨੂੰ ਅਗਾਂਹ ਖੜਨ ਵਾਲਾ ਵੀ। ਹੱਦਾਂ ਸਰਹੱਦਾਂ ਤੋਂ ਪਾਰ ਕੁੱਲ ਆਲਮ ਵਿੱਚ ਖਿੱਲਰੇ ਸਾਡੇ ਪੰਜਾਬੀ ਭਾਈਚਾਰੇ ਲਈ ਇਹ ਤਰੱਦਦ ਕੀ ਰੰਗ ਲਿਆਉਂਦਾ ਹੈ, ਇਹ ਤਾਂ ਭਲਕ ਦੀ ਬੁੱਕਲ ਵਿੱਚ ਹੈ। ਅਸਾਂ ਆਪਣੇ ਵੱਲ ਪੂਰੀ ਵਾਹ ਲਾਈ ਏ ਕਿ ਜੇ ਸਾਡਾ ਭਾਈਚਾਰਾ ਨਜਮੀ ਦੀ ਸ਼ਇਰੀ ਤੋਂ ਕੋਈ ਸਿੱਖ ਮੱਤ ਲੈ ਕੇ ਆਪਣਾ ਭਲਾ ਬੁਰਾ ਸੋਚਣ ਵੱਲ ਟੁਰ ਪਵੇ। ਫੇਰ ਅਸੀਂ ਸਮਝਾਂਗੇ ਕਿ ਸਾਡੀ ਘਾਲ ਥਾਂਏ ਪਈ ਹੈ। ਰਹੀਆਂ ਖਾਮੀਆਂ ਤੇ ਭੁੱਲਾਂ ਲਈ ਖਿਮਾਂ ਤੇ ਨੇਕ ਸਲਾਹਾਂ ਦੀਆਂ ਆਸਾਂ ਉਮੀਦਾਂ ਨਾਲ ਸਾਡੀ ਪਰ੍ਹਿਆ ਵਿੱਚ ਹਾਜ਼ਰੀ ਕਬੂਲ ਕਰਨੀ।
-ਮੋਤਾ ਸਿੰਘ ਸਰਾਏ
ਸੰਚਾਲਕ ਯੂਰਪੀ ਪੰਜਾਬੀ ਸੱਥ
ਵਾਲਸਾਲ, ਯੂ.ਕੇ.।
-ਡਾ. ਨਿਰਮਲ ਸਿੰਘ
ਸੇਵਾਦਾਰ ਪੰਜਾਬੀ ਸੱਥ
ਲਾਂਬੜਾ ਜਲੰਧਰ।
