ਕੀ ਕਹਿੰਦਾਂ ਏਂ, ਮੇਰੇ 'ਤੇ ਇਤਬਾਰ ਨਹੀਂ

ਮਤਲਬ। ਤੈਨੂੰ ਤੇਰੇ 'ਤੇ ਇਤਬਾਰ ਨਹੀਂ

 

ਉਹਦੇ ਪਿੰਡੋਂ ਕਾਂ ਤੇ ਆਉਂਦੇ ਹੋਵਣਗੇ

ਮੈਨੂੰ ਏਸ ਬਨੇਰੇ 'ਤੇ ਇਤਬਾਰ ਨਹੀਂ

 

ਨੁਕਤੇ ਨੂੰ ਪ੍ਰਕਾਰ ਨੇ ਚੱਕਰ ਦਿੱਤਾ ਏ

ਤਾਹੀਂਓ ਗੋਲ ਘਤੇਰੇ 'ਤੇ ਇਤਬਾਰ ਨਹੀਂ

 

ਮੈਂ ਅੱਖਾਂ 'ਤੇ ਚੁੰਨੀ ਵਲ ਕੇ ਸੌਂਨੀ ਆਂ

ਸੁਫ਼ਨਾ ਕਹਿੰਦਾ ਏ ਨ੍ਹੇਰੇ 'ਤੇ ਇਤਬਾਰ ਨਹੀਂ

 

ਪੱਖੀ ਵਾਸਣ* ਅੱਖ ਦਾ ਅੱਲ੍ਹਾ ਹਾਫ਼ਿਜ਼ ਏ

ਜਿਹਨੂੰ ਆਪਣੇ ਡੇਰੇ 'ਤੇ ਇਤਬਾਰ ਨਹੀਂ

 

ਦਿਲ ਦਰਿਆ ਅੱਜ 'ਤਾਹਿਰਾ’ ਚੜ੍ਹਿਆ ਹੋਇਆ ਏ

ਇਹਦੇ ਘੁੰਮਣਘੇਰੇ ’ਤੇ ਇਤਬਾਰ ਨਹੀਂ

----------------------

*ਖਾਨਾ ਬਦੋਸ਼