ਖੋਤੇ ਨਾ ਘੋੜੇ, ਭਾੜੇ ਦੇ ਟੱਟੂ

ਪਰਾਤਾਂ ਢਾਲ ਕੇ ਤੋਪਾਂ ਬਣਾਉਣ ਵਾਲੇ

ਹੁਣ ਸਾਡੀਆਂ ਕੌਲੀਆਂ ਖੋਹ ਕੇ

ਨੋਟ ਛਾਪਣ ਵਾਲੀਆਂ ਮਸ਼ੀਨਾਂ ਪਏ ਬਣਾਉਂਦੇ ਨੇ

ਬੇਬੇ ਨੀ ਬੇਬੇ ਮੈਨੂੰ ਨੀਂਦਰ ਆਈ ਏ

ਮੈਂ ਸੁਫ਼ਨਿਆਂ ਤੋਂ ਡਰਦੀ ਸੌਂਦੀ ਨਹੀਂ

ਅਜੇ ਪਹਿਲੇ ਪੂਰੇ ਨਹੀਂ ਹੋਏ,

ਉੱਤੋਂ ਨਵਿਆਂ ਘੇਰਾ ਘੱਤ ਲਿਆ ਏ

ਖੌਰੇ ਮੈਨੂੰ ਸੰਗਸਾਰ* ਕਰੂ ਨੇ

ਪਰ ਮੈਂ ਹੁਣ ਅੱਖਾਂ ਬੰਦ ਨਹੀਂ ਕਰਨੀਆਂ

ਜਿੰਨਾ ਚਿਰ ਖੁਲ੍ਹੀਆਂ ਨੇ, ਜਿਉਂਦੀ ਆਂ

ਬੇਬੇ ! ਮੇਰੀ ਭੈਣ ਕਹਿੰਦੀ ਏ, "ਤੈਨੂੰ ਚਾਦਰ ਲੈਣ ਦਾ ਵੱਲ ਨਹੀਂ"

ਹਰ ਸਾਹ ਲੈਂਦੀ ਸ਼ੈਅ ਨਾਲ ਮੇਰਾ ਸਾਹ ਦਾ ਰਿਸ਼ਤਾ ਏ

ਮੈਂ ਇਹ ਚਿੱਟੀ ਚਾਦਰ ਕੀ ਕਰਨੀ ਏ?

ਬੇਬੇ ਨੀ! ਮੈਥੋਂ ਰੀਝਾਂ ਵੇਲ ਵੇਲ ਤਵੇ 'ਤੇ ਨਹੀਂ ਪਾ ਹੁੰਦੀਆਂ

ਮੈਂ ਵਿਚਾਰੀ ਨਹੀਂ ਬਣਨਾ

ਗੱਲ ਕਰਾਂਗੀ

ਮੇਰੇ ਤੋਂ ਮਰਚਾਂ ਵਾਰ

ਮੈਂ ਬੋਲਣਾ ਸਿੱਖ ਲਿਆ ਏ

-----------------------------------

*ਪੱਥਰ ਮਾਰ-ਮਾਰ ਕੇ ਮਾਰ ਦੇਣ ਦੀ ਸਜ਼ਾ