28. ਕੈਦੀ

ਬੁਲਬੁਲ, ਨਿੱਕੀ ਜਿਹੀ, ਸੁਹਣੀ ਜਿਹੀ,

ਪਿੰਜਰੇ ਅੰਦਰ ਕੈਦ,

ਪਿੰਜਰਾ ਲੋਹੇ ਦੀਆਂ ਸੀਖਾਂ ਦਾ,

ਉਹ ਨਨ੍ਹੀ ਸੁਹਲ ਜਿੰਦੜੀ !

 

ਤੜਫਦੀ, ਖੰਭ ਮਾਰਦੀ,

ਚੁੰਝਾਂ, ਨਾਲੇ ਪੌਂਚੇ,

ਟੁੱਟਦਾ ਨਾ, ਇਹ ਲੋਹੇ ਦਾ ਪਿੰਜਰਾ,

ਬੁਲਬੁਲ ਕੈਦ, ਬੇ-ਬਸ, ਤਰਸ-ਯੋਗ !

 

ਮੇਰੀ ਜਿੰਦ,

ਸੋਹਣੀ ਜਿਹੀ, ਨਿੱਕੀ ਜਿਹੀ, ਸੁਬਕ ਬੁਲਬੁਲ,

ਕੈਦ-

ਖਾਹਸ਼ਾਂ ਦੀਆਂ ਸੀਖਾਂ ਅੰਦਰ,

ਦੁਜੈਗੀ ਦੀਆਂ ਕੰਧਾਂ ਅੰਦਰ,

ਫਰੇਬਾਂ ਦੇ ਪਰਦੇ ਅੰਦਰ,

ਮੂਰਖਤਾ ਦੇ ਕੋਠੇ ਅੰਦਰ-

ਸਿਰ ਪਟਕਦੀ,

ਖਾਹਸ਼ਾਂ ਦੀ ਪੂਰਤੀ ਲਈ,

ਫਰੇਬਾਂ ਦੀ ਕਾਮਯਾਬੀ ਲਈ,

ਤੇ ਲਹੂ ਲੁਹਾਨ ਹੁੰਦੀ ।