ਨਾ ਸੁਰ ਹੋਇਆ ਸਰੋਦਾ

ਦੁਏ ਹਥ ਖੋਲ੍ਹ ਕੇ ਦਾਤਾ !

ਦਿਵਾਂਦਾ ਜਾ, ਦਿਵਾਂਦਾ ਜਾ !

ਨ ਝੋਲੀ ਵੱਲ ਤੱਕ ਸਾਡੀ,

ਤੂੰ ਪਾਂਦਾ, ਖੈਰ ਪਾਂਦਾ ਜਾ !

ਉਲਟ ਆਕਾਸ਼! ਬਨ ਕਾਸਾ,

ਸਮੁੰਦਰ ! ਉਲਟ ਪੈ ਜਾ ਵਿਚ,

ਜ਼ਮਾਨਾ ਉਲਟ, ਬਨ ਸਾਕੀ,

ਖਿੜੇ ਮੱਥੇ ਪਿਲਾਂਦਾ ਜਾ !

ਕਿ ਹੈ ਸਿਰ ਪੀੜ ਸਭ ਕੁਛ ਹੀ;

ਦਵਾ ਤੇ ਦਰਦ ਸਿਰ ਦਰਦੀ,

ਇਕੋ ਦਾਰੂ ਹੈ 'ਹਮਦਰਦੀ’,

ਮਿਲੇ, ਲੈ, ਹਈ, ਲੁਟਾਂਦਾ ਜਾ !

ਚਿਣਗ ਪ੍ਯਾਰਾਂ ਦੀ ਆ ਡਿੱਗੀ,

ਜੇ ਦਾਮਨ ਛੁਹ ਗਈ ਤੇਰੇ,

ਸ਼ਮਅ ਵਾਂਙੂ ਤੂੰ ਹੋ ਰੌਸਨ

ਜਗਾਂਦਾ ਨੂਰ ਲਾਂਦਾ ਜਾ !

ਜੁ ਲਾਲੀ ਆ ਚੜ੍ਹੇ ਬੱਦਲ,

ਹੋ ਕਾਲੀ ਸ਼ਾਮ ਨੂੰ ਆਖ਼ਰ,

ਉਦਾਸੀ ਆ ਫੜੇ ਛੇਕੜ

ਜੁ "ਮੈਂ ਮੈਂ" ਤੂੰ ਬਫਾਂਦਾ ਜਾ !