ਵੀਰ ਆਗਮ

ਪਰਦੇਸਾਂ ਤੋਂ ਹੋ ਆਏ ਵੀਰ ਨੂੰ ਭੈਣ

ਦੁਨੀਆਂ ਦੇਖ ਪਰਤਿਆ ਵੀਰਾ

ਆ ਪਹੁਤੈ ਨਿਜ ਹਿੰਦ,

ਆ ਪਹੁਤੈਂ ਹੁਣ ਹਿੰਦ ਆਪਣੇ,

ਅਪਣੇ ਅਪਣੇ ਹਿੰਦ,

ਆ ਪਹੁਤੇ ਹੁਣ ਦੇਸ਼ ਸੁਹਣਿਆ।

ਹੁਣ ਚਲ ਅਪਣੇ ਪਿੰਡ,

ਹੁਣ ਚਲ ਅਪਣੇ ਪਿੰਡ ਵੀਰਨਾਂ,

ਹੁਣ ਚਲ ਅਪਣੇ ਪਿੰਡ।

ਓਥੇ ਆਪਣੇ ਪਿੰਡ ਵਿਚ ਕੀਹ ਹੈ?-

ਮੱਲ ਗੁਜ਼ਾਰਾਂ ਦੇਖ ਸੁਹਣੀਆਂ,

ਹਰੇ ਹਰੇ ਤਕ ਘਾਹ,

ਤੂਤ ਪਲਮਦੇ ਸਾਵੇ ਕਾਲੇ,

ਚਖਿਆਂ ਪੈਂਦੀ ਜਿੰਦ,

ਵਗਦੇ ਖੂਹ ਦੇ ਰਾਗ ਸੁਣੀ ਆ,

ਚੁਹਕੇ ਚਿੜੀ ਅਚਿੰਦ।

ਚਲ ਹੁਣ ਅਪਣੇ ਪਿੰਡ ਵੀਰਨਾਂ,

ਹੁਣ ਚਲ ਅਪਣੇ ਪਿੰਡ।

ਪਿਪਲ ਬੈਠੀ ਡਾਰ ਤੋਤਿਆਂ

ਵੇਖ ਕਬੂਤਰ ਉਡਦੇ,

ਗਗਨ ਤਾਰੀਆਂ ਲੈਣ ਸਿਲਾਰੇ

ਫ਼ਿਕਰ ਜਿਨ੍ਹਾਂ ਨਾ ਬਿੰਦ।