*

ਜੇ ਲੱਜਪਾਲ ਮੁਹੱਬਤ ਕਰੀਏ

ਕੀਹਦੇ ਨਾਲ਼ ਮੁਹੱਬਤ ਕਰੀਏ

 

ਅੱਖਾਂ ਪਾੜਕੇ ਵੇਖੇ 'ਨੇਰ੍ਹਾ

ਬੱਤੀਆਂ ਬਾਲ਼ ਮੁਹੱਬਤ ਕਰੀਏ

 

ਵੇਖ ਲਵਾਂਗੇ ਜੋ ਹੋਵੇਗਾ

ਹੁਣ ਫ਼ਿਲਹਾਲ ਮੁਹੱਬਤ ਕਰੀਏ

 

ਏਨਾ ਕਾਹਨੂੰ ਸੋਚੀ ਜਾਨਾ ਏ

ਦੇ ਮਿਸਕਾਲ ਮੁਹੱਬਤ ਕਰੀਏ

 

ਜਿਵੇਂ ਮਰਜ਼ੀ ਹਿਜਰ ਨਖੱਤਾ

ਮਗਰੋਂ ਟਾਲ ਮੁਹੱਬਤ ਕਰੀਏ

 

ਇਹ ਵੀ ਮੈਨੂੰ ਆਪੇ ਈ ਦੱਸਦੇ

ਕਿੰਨੇ ਸਾਲ ਮੁਹੱਬਤ ਕਰੀਏ

 

ਸੱਜਣਾ ਸਾਨੂੰ ਘੁੱਟਕੇ ਲਾ ਲੈ

ਸੀਨੇ ਨਾਲ ਮੁਹੱਬਤ ਕਰੀਏ

 

ਸਾਹਵਾਂ ਦਾ ਐਤਬਾਰ ਨਈਂ 'ਬੁਸ਼ਰਾ'

ਛੇਤੀ ਨਾਲ਼ ਮੁਹੱਬਤ ਕਰੀਏ