ਮੁਲਕ ਅਹਿਮਦ ਗ੍ਰਿਫਤ ਜੱਸਾ ਕਲਾਲ॥
ਲਾਹੌਰ ਜੇਤੂ ਖਾਲਸਾ ਪੰਥ ਦਾ ਸੁਲਤਾਨ ਉਲ ਕੌਮ ਸਰਦਾਰ ਜੱਸਾ ਸਿੰਘ ਆਹਲੂਵਾਲੀਆ ਅਕਾਲ ਬੁੰਗੇ 'ਤੇ ਆ ਖੜ੍ਹਾ ਹੋਇਆ, 'ਖਾਲਸਾ ਜੀ... ਸਤਿਗੁਰਾਂ ਦੀ ਕਿਰਪਾ ਨਾਲ ਪੰਜਾਬ ਵਿਚ ਖਾਲਸਾ ਜੀ ਦੇ ਬੋਲ ਬਾਲੇ ਹੋਣ ਲੱਗੇ ਹਨ। ਪੰਜਾਂ ਦਰਿਆਵਾਂ ਦੀ ਧਰਤੀ 'ਤੇ ਖਾਲਸੇ ਦੇ ਨਿਸ਼ਾਨ ਝੂਲਣ ਦਾ ਵੇਲਾ ਆ ਢੁੱਕਾ ਹੈ...", ਦੀਵਾਲੀ ਦੇ ਮੌਕੇ ਦਰਬਾਰ ਸਾਹਿਬ ਇਕੱਤਰ ਹੋਏ ਸਰਬੱਤ ਖਾਲਸਾ ਨੂੰ ਮੁਖਾਤਿਬ ਹੁੰਦਿਆਂ ਸਰਦਾਰ ਜੱਸਾ ਸਿੰਘ ਆਹਲੂਵਾਲੀਆ ਨੇ ਬੋਲਣਾ ਸ਼ੁਰੂ ਕੀਤਾ।
ਅਬਦਾਲੀ ਪਾਨੀਪਤ ਵਿਚ ਮਰਹੱਟਿਆਂ ਨਾਲ ਰੁੱਝਿਆ ਹੋਇਆ ਸੀ ਤੇ ਖਾਲਸਾ ਜੀ ਨੇ ਆਪਣੀ ਤਾਕਤ ਸੰਗਠਤ ਕਰਕੇ ਹੋਰ ਮਜਬੂਤੀ ਫੜ੍ਹ ਲਈ। ਪਾਨੀਪਤ ਜੰਗ ਦੇ ਥੱਕੇ ਹਾਰੇ ਅਫਗਾਨ ਕਾਬਲ ਮੁੜ ਰਹੇ ਸਨ। ਹਲਾਂਕਿ ਜਾਂਦਿਆਂ ਨੂੰ ਰਾਹ ਵਿਚ ਕਈ ਥਾਈਂ ਸਿਖ ਜੱਥਿਆਂ ਨੇ ਲੁੱਟਿਆ। ਪਰ ਉਹਨਾਂ ਵਿਚ ਏਨੀ ਤਾਕਤ ਨਹੀਂ ਬਚੀ ਸੀ ਕਿ ਸਿਖਾਂ ਦੇ ਹਮਲੇ ਦਾ ਟਾਕਰਾ ਕਰਨ ਲਈ ਖਲੋ ਸਕਣ। ਇਸ ਸਮੇਂ ਅੰਦਰ ਖਾਲਸਾ ਜੀ ਨੇ ਲਗਭਗ ਸਾਰੇ ਪੰਜਾਬ ਨੂੰ ਸੋਧ ਲਿਆ ਤੇ ਦੁਸ਼ਟ ਜਮਪੁਰੀ ਪੁਚਾਏ। ਲਾਹੌਰ ਜਿੱਤਣ ਮਗਰੋਂ ਹੁਣ ਖਾਲਸਾ ਜੀ ਦਾ ਅਗਲਾ ਟੀਚਾ ਪੂਰਾ ਪੰਜਾਬ ਵਿਦੇਸ਼ੀ ਧਾੜਵੀਆਂ ਤੋਂ ਮੁਕਤ ਕਰਵਾਉਣਾ ਸੀ।
"ਹੁਣ ਸਮਾਂ ਪੰਥ ਦੇ ਵਿਰੁੱਧ ਮੁਖਬਰੀਆਂ ਤੇ ਚੁਗਲੀਆਂ ਕਰਦੇ ਰਹੇ ਚੁਗਲਾਂ ਤੇ ਬਾਕੀ ਬਚੇ ਜ਼ਾਲਮ ਸੂਬੇਦਾਰਾਂ ਨੂੰ ਸੋਧਣ ਦਾ ਹੈ... ਨਿਰੰਜਨੀਏ ਮਹੰਤ, ਕਸੂਰੀਏ ਖੇਸ਼ਗੀ, ਮਲੇਰਕੋਟੀਏ ਅਫਗਾਨ ਤੇ ਸਰਹੰਦ ਦਾ ਜ਼ੈਨ ਖਾਨ... ਮਿਆਨਾਂ ਵਿਚ ਬੈਠੀ ਚੰਡੀ ਹੁਣ ਇਹਨਾਂ ਸਭਨਾ ਦੀ ਰੱਤ ਪੀਣ ਲਈ ਕਾਹਲੀ ਹੈ. ਆਓ ਉਸ ਦੀ ਤੇਹ ਮਿਟਾਈਏ, ", ਸਰਦਾਰ ਜੱਸਾ ਸਿੰਘ ਨੇ ਸਿੰਘਾਂ ਦੇ ਹੋਏ ਗੁਰਮਤੇ ਤੋਂ ਪੰਥ ਨੂੰ ਜਾਣੂ ਕਰਵਾਇਆ।
ਪਾਨੀਪਤ ਵਿਚ ਹਾਰੇ ਮਰਹੱਟਿਆਂ ਨੂੰ ਦਸ ਸਾਲ ਸੁਰਤ ਆਉਣ ਨੂੰ ਲੱਗੇ, ਪੈਰਾਂ ਸਿਰ ਤਾਂ ਉਹ ਮੁੜ ਦੁਬਾਰਾ ਹੋ ਹੀ ਨਹੀਂ ਸਕੇ। ਵੱਡਾ ਪੇਸ਼ਵਾ ਆਪਣੇ ਪੁੱਤਰ ਦੀ ਮੌਤ ਅਤੇ ਏਡੀ ਭਿਆਨਕ ਕਤਲੇਆਮ ਭਰੀ ਹਾਰ ਦੇਖ ਕੇ ਪਾਗਲ ਹੋ ਕੇ ਮਰਿਆ।
