ਨਜ਼ਰ ਆਉਂਦੀਆਂ ਹਨ। ਉਦਾਹਰਣ ਵਜੋਂ ਜੇ ਤੁਸੀਂ ਕਿਸੇ ਨਾਲ ਆਹਮੋ ਸਾਹਮਣੇ ਗੱਲ ਕਰ ਰਹੇ ਹੋਵੋ ਅਤੇ ਕੁਝ ਸਮੇਂ ਬਾਦ ਉਸ ਦਾ ਇਕ ਪੈਰ ਬਾਹਰ ਵੱਲ ਨੂੰ ਮੁੜ ਜਾਵੇ ਅਤੇ ਦੂਜਾ ਪੈਰ ਹਾਲੇ ਵੀ ਤੁਹਾਡੇ ਵੱਲ ਹੀ ਹੋਵੇ, ਤਾਂ ਇਹ ਸਮਝ ਲਵੋ ਕਿ ਉਹ ਹੁਣ ਜਾਣਾ ਚਾਹੁੰਦੀ ਹੈ, ਭਾਵੇਂ ਤੁਹਾਨੂੰ ਇਹ ਹੀ ਲਗ ਰਿਹਾ ਹੋਵੇ ਕਿ ਗਲਬਾਤ ਬਹੁਤ ਵਧੀਆ ਚੱਲ ਰਹੀ ਹੈ। ਉਸ ਦਾ ਸਰੀਰ ਹਾਲੇ ਵੀ ਤੁਹਾਡੇ ਆਹਮੋ ਸਾਹਮਣੇ ਹੈ ਪਰ ਇਕ ਪੈਰ 'ਜਾਣ' ਦੀ ਇੱਛਾ ਦਾ ਇਸ਼ਾਰਾ ਕਰ ਰਿਹਾ ਹੁੰਦਾ ਹੈ। ਹੋ ਸਕਦਾ ਹੈ ਉਸਨੇ ਕਿਸੇ ਨੂੰ ਸਮਾਂ ਦਿੱਤਾ ਹੋਇਆ ਹੋਵੇ ਜਾਂ ਫਿਰ ਉਸਨੇ ਵੈਸੇ ਹੀ ਫੈਸਲਾ ਕਰ ਲਿਆ ਹੋਵੇ ਕਿ ਹੁਣ ਉਸ ਨੂੰ ਚਲੇ ਜਾਣਾ ਚਾਹੀਦਾ ਹੈ। ਕਿਸੇ ਵੀ ਵਿਅਕਤੀ ਦੇ ਰਵੱਈਏ ਬਾਰੇ ਪੈਰ ਬਹੁਤ ਕੁੱਝ ਦਸ ਦਿੰਦੇ ਹਨ।

ਇਨ੍ਹਾਂ ਇਰਾਦੇ ਵਾਲੀਆਂ ਹਰਕਤਾਂ ਨੂੰ ਸਮਝਣ ਨਾਲ ਬਹੁਤ ਵਾਰੀ ਸਾਡੇ ਆਪਸੀ ਸਬੰਧ ‘ਬਚ' ਜਾਂਦੇ ਹਨ। ਬਹੁਤ ਸਾਰੇ ਲੋਕ ਤਹਿਜ਼ੀਬ ਕਾਰਨ ਆਪਣੇ ਇਰਾਦੇ ਸ਼ਬਦਾਂ ਵਿਚ ਨਹੀਂ ਪ੍ਰਗਟਾਉਂਦੇ। ਉਹ ਇਸੇ ਚੀਜ਼ ਤੇ ਨਿਰਭਰ ਕਰ ਰਹੇ ਹੁੰਦੇ ਹਨ ਕਿ ਤੁਸੀਂ ਉਨ੍ਹਾਂ ਦੀ ਸਰੀਰਕ ਭਾਸ਼ਾ ਨੂੰ ਸਮਝ ਲਵੋਗੇ। ਜੇ ਕਰ ਉਨ੍ਹਾਂ ਨੂੰ ਤੁਹਾਨੂੰ ਸਮਝਾਉਣ ਲਈ ਬਾਰ ਬਾਰ ਐਸੀਆਂ (ਇਰਾਦਾ ਪ੍ਰਗਟਾਉਣ ਵਾਲੀਆਂ) ਹਰਕਤਾਂ ਕਰਨੀਆਂ ਪੈਣ ਤਾਂ ਉਨ੍ਹਾਂ ਅੰਦਰ ਇਕ ਖਿੱਝ ਪੈਦਾ ਹੋ ਜਾਂਦੀ ਹੈ। ਫਿਰ ਉਨ੍ਹਾਂ ਨੂੰ ਤੁਹਾਡੇ ਨਾਲ ਹੋਈ ਗਲਬਾਤ ਬਾਰੇ ਬੱਸ ਇਹੀ ਯਾਦ ਰਹਿੰਦਾ ਹੈ, ਹੋਰ ਕੁਝ ਨਹੀਂ। ਇਸ ਤੋਂ ਨਕਾਰਾਤਮਕ ਭਾਵਨਾਵਾਂ ਪੈਦਾ ਹੋ ਜਾਂਦੀਆਂ ਹਨ।

ਕਈ ਵਾਰੀ ਕਿਸੇ ਭੁਲੇਖੇ ਦੀ ਗੁੰਜਾਇਸ਼ ਨਹੀਂ ਰਹਿੰਦੀ। ਤੁਸੀਂ ਕਿਸੇ ਨਾਲ ਗੱਲ ਕਰ ਰਹੇ ਹੋ ਅਤੇ ਉਹ ਤੁਹਾਡੇ ਤੋਂ ਥੋੜ੍ਹਾ ਜਿਹਾ ਇਕ ਪਾਸੇ ਹੋ ਕੇ ਖੜ੍ਹੇ ਹੋ ਜਾਂਦੇ ਹਨ ਅਤੇ ਦੋਵੇਂ ਪੈਰ ਤੁਹਾਡੇ ਤੋਂ ਪਰੇ ਵਾਲੇ ਪਾਸੇ ਵੱਲ ਨੂੰ ਹੁੰਦੇ ਹਨ। ਹਾਲਾਂਕਿ ਚਿਹਰਾ ਹਾਲੇ ਵੀ ਐਸਾ ਕੁਝ ਨਹੀਂ ਦੱਸ ਰਿਹਾ ਹੁੰਦਾ ਪਰ ਪੈਰ ਇਹ ਸਪਸ਼ਟ ਕਰ ਦਿੰਦੇ ਹਨ ਕਿ ਉਹ ਕਿੱਧਰ ਜਾਣਾ ਚਾਹੁੰਦੇ ਹਨ।

ਖੋਜ ਕਰਨ ਵਾਲਿਆਂ ਦਾ ਇਹ ਵਿਚਾਰ ਹੈ ਕਿ ਸਾਡੇ ਪੈਰ ਤੇ ਲੱਤਾਂ ਸਾਡੇ ਸਭ ਤੋਂ 'ਇਮਾਨਦਾਰ' ਅੰਗ ਹਨ। ਇਸਦਾ ਕਾਰਨ ਇਹ ਹੈ ਕਿ ਆਦਿ ਕਾਲ ਤੋਂ ਹੀ ਖਤਰੇ ਸਮੇਂ ਸਾਡੇ ਪੈਰਾਂ ਤੇ ਲੱਤਾਂ ਨੂੰ ਝੱਟ ਹੀ ਭਜਣਾ ਪੈਂਦਾ ਸੀ—ਇਸ ਤੋਂ ਪਹਿਲਾਂ ਕਿ ਅਸੀਂ ਸੁਚੇਤ ਤੌਰ ਤੇ ਭੱਜਣ ਦਾ ਫੈਸਲਾ ਕਰਦੇ। ਤਾਂ ਹੀ ਬਚਾਅ ਹੋ ਸਕਦਾ ਸੀ।

ਸਾਡੇ ਸਰੀਰ ਦੇ ਹੇਠਲੇ ਹਿੱਸੇ ਦੇ ਅੰਗ ਸਾਡੀਆਂ ਨਾਂਹ-ਪੱਖੀ ਅਤੇ ਹਾਂ-ਪੱਖੀ ਸੋਚਾਂ ਬਾਰੇ ਅਚੇਤ ਹੀ ਦੱਸ ਦਿੰਦੇ ਹਨ। ਜਦੋਂ ਅਸੀਂ ਉਤੇਜਿਤ ਹੁੰਦੇ ਹਾਂ ਅਤੇ ਕਿਸੇ ਮਨਭਾਉਂਦੇ ਮਸ਼ਹੂਰ ਵਿਅਕਤੀ ਦੀ ਇੰਤਜ਼ਾਰ ਕਰ ਰਹੇ ਹੁੰਦੇ ਹਾਂ, ਤਾਂ ਬੈਠੇ ਹੋਏ ਵੀ ਸਾਡੇ ਪੈਰ ਉਪਰ- ਥੱਲੇ ਹੁੰਦੇ ਰਹਿੰਦੇ ਹਨ। ਇਸੇ ਤਰ੍ਹਾਂ ਤੁਸੀਂ ਕਿਤੇ ਇੰਟਰਵਿਊ ਦੇਣ ਗਏ ਹੋ ਅਤੇ ਇੰਟਰਵਿਊ ਲੈਣ ਵਾਲਾ ਦੇਰ ਨਾਲ ਪਹੁੰਚੇ, ਤਾਂ ਇਤਜ਼ਾਰ ਵਿਚ ਤੁਹਾਡੇ ਪੈਰ ਉਪਰ-ਥੱਲੇ ਵੱਲ ਹਿਲਦੇ ਰਹਿੰਦੇ ਹਨ, ਭਾਵੇਂ ਤੁਸੀਂ ਲੱਤਾਂ ਮੋੜਕੇ ਵੀ ਰੱਖੀਆਂ ਹੋਣ।